Zelenskiy Aliyev va Erdo‘g‘on Putin bilan muzokaralar bo‘yicha takliflar bilan chiqishganini ma’lum qildi

Ukraina prezidenti Vladimir Zelenskiy Ozarbayjon prezidenti Ilhom Aliyev hamda Turkiya prezidenti Rajab Toyyib Erdo‘g‘on unga Rossiya davlat rahbari Vladimir Putin bilan vaziyatni tartibga solish yuzasidan muzokaralar tashkillashtirib berishni taklif qilishgani haqida gapirdi. Zelenskiy bu haqda o‘z Telegram kanalida ma’lum qilgan.

Ukraina prezidentining so‘zlariga ko‘ra, 26-fevral kuni u bir qator davlatlarning rahbarlari, xususan, Aliyev va Erdo‘g‘on bilan telefon orqali suhbatlashgan.

“Aliyev ham Erdo‘g‘on ham Rossiya bilan muzokaralar tashkillashtirishni taklif qilishdi va men ularning ushbu tashabbusini ma’qullayman”, — degan Zelenskiy.

Zelenskiyning aytishicha, Ozarbayjon prezidenti bilan suhbatda Ilhom Haydarovich Aliyevni Ukrainaning mehribon do‘sti ekanini ta’kidlab, unga mamlakatda neft va neft mahsulotlari tanqisligi kuzatilayotgani haqida gapirib bergan.

“Do‘stimiz Erdo‘g‘onga ham Ukraina mustaqilligi va hududiy yaxlitligini qo‘llab-quvvatlagani uchun minnatdorlik bildiraman”, — deya qo‘shimcha qilgan Zelenskiy.

24-fevralga o‘tar kechasi Rossiya prezidenti Vladimir Putin Donbassda “mintaqa aholisini genotsiddan himoya qilish” uchun “maxsus harbiy operatsiya” boshlanganini e’lon qildi. Murojaatdan so‘ng ijtimoiy tarmoqlarda Ukrainaning ko‘plab shaharlarida portlashlar sodir bo‘lgani haqida xabarlar paydo bo‘ldi. Ukraina Ichki ishlar vazirligi rahbari maslahatchisi Anton Gerashchenko 24-fevral kuni erta tongda Kiyev, Xarkov va Dneprda harbiy infratuzilma obyektlariga raketa zarbalari berilganini ma’lum qildi.

24-fevralda Rossiya Ukrainaga bostirib kirgach, Buyuk Britaniya mamlakatga qarshi yangi sanksiyalar qo‘llagan, xususan “Aeroflot” kompaniyasining qirollik hududiga parvozlarini taqiqlagan. AQSh prezidenti Jo Bayden Rossiya Ukraina hududiga bostirib kirgani va u yerda harbiy operatsiyalarni boshlagani uchun mamlakatga nisbatan yangi sanksiyalar joriy qilgan. Shuningdek, Bayden Rossiyaning Ukrainaga hujumi uchun mas’uliyat Vladimir Putinning zimmasida ekani, Rossiya ushbu harbiy operatsiya uchun jiddiy zarbalar qabul qilib olishi haqida gapirgan.

Keyinchalik 25-fevralda AQSh Putin, Lavrov va Shoyguga qarshi sanksiyalar e’lon qildi, shuningdek 26-fevralda Oq uyning Zelenskiyga Kiyevni tark etishida yordam berishga tayyorligi xabar qilindi. AQSh prezidenti Jo Bayden Ukrainaga harbiy ehtiyojlar uchun zudlik bilan moliyaviy yordam ko‘rsatishni buyurgan, Fransiya prezidenti Emmanuel Makron esa Ukrainadagi urushning uzoq davom etishini taxmin qilgan.