Ikki mingdan ziyod rossiyalik rassomlar, san’atshunoslar va arxitektorlar Ukrainaga qarshi urushni qoralab ochiq xat yozdi

Rossiyada ikki mingdan ziyod rassomlar, san’atshunoslar, arxitektorlar, prodyuserlar, musiqachilar va madaniyat hamda san’at sohasining boshqa vakillari Ukrainaga qarshi boshlangan urushni qoralab ochiq xat yozishdi.

“Biz, rassomlar, san’at arboblari, arxitektorlar, tanqidchilar, san’atshunoslar, art-menejerlar — Rossiya Federatsiyasining san’at va madaniyat sohasi vakillari — Ukraina xalqini qo‘llab-quvvatlaymiz va bir ovozdan, qat’iyat bilan “Yo‘q bo‘lsin urush!” deymiz. Barcha harbiy harakatlarni zudlik bilan to‘xtatishni, Ukraina hududidan harbiy qo‘shinni olib chiqishni va tinchlik o‘rnatish yuzasidan muzokaralarni boshlashni talab qilamiz”, – deyiladi ochiq xatda.

Avval rus tilida so‘zlashadigan olimlar xalqaro assosiatsiyasi (RASA) Rossiyaning Ukrainaga qilgan qurolli hujumini qoralovchi bayonotni e’lon qilgandi. Bayonot matnida Rossiya qilayotgan ishlar Ukraina xalqi oldidagi eng og‘ir jinoyat ekanligi, ushbu harakatlar Rossiyani ijtimoiy iztirob va izolyatsiyaga duchor qilishi bayon etilgan. Matnni o‘nlab olimlar, xususan, Nobel mukofoti laureati Andrey Geym ham imzolagan.

24-fevralga o‘tar kechasi Rossiya prezidenti Vladimir Putin Donbassda “mintaqa aholisini genotsiddan himoya qilish” uchun “maxsus harbiy operatsiya” boshlanganini e’lon qildi. Murojaatdan so‘ng ijtimoiy tarmoqlarda Ukrainaning ko‘plab shaharlarida portlashlar sodir bo‘lgani haqida xabarlar paydo bo‘ldi. Ukraina Ichki ishlar vazirligi rahbari maslahatchisi Anton Gerashchenko 24-fevral kuni erta tongda Kiyev, Xarkov va Dneprda harbiy infratuzilma obyektlariga raketa zarbalari berilganini ma’lum qildi.

24-fevralda Rossiya Ukrainaga bostirib kirgach, Buyuk Britaniya mamlakatga qarshi yangi sanksiyalar qo‘llagan, xususan “Aeroflot” kompaniyasining qirollik hududiga parvozlarini taqiqlagan. AQSh prezidenti Jo Bayden Rossiya Ukraina hududiga bostirib kirgani va u yerda harbiy operatsiyalarni boshlagani uchun mamlakatga nisbatan yangi sanksiyalar joriy qilgan. Shuningdek, Bayden Rossiyaning Ukrainaga hujumi uchun mas’uliyat Vladimir Putinning zimmasida ekani, Rossiya ushbu harbiy operatsiya uchun jiddiy zarbalar qabul qilib olishi haqida gapirgan.