Зеленский Алиев ва Эрдўғон Путин билан музокаралар бўйича таклифлар билан чиқишганини маълум қилди

Украина президенти Владимир Зеленский Озарбайжон президенти Илҳом Алиев ҳамда Туркия президенти Ражаб Тоййиб Эрдўғон унга Россия давлат раҳбари Владимир Путин билан вазиятни тартибга солиш юзасидан музокаралар ташкиллаштириб беришни таклиф қилишгани ҳақида гапирди. Зеленский бу ҳақда ўз Telegram каналида маълум қилган.

Украина президентининг сўзларига кўра, 26 февраль куни у бир қатор давлатларнинг раҳбарлари, хусусан, Алиев ва Эрдўғон билан телефон орқали суҳбатлашган.

«Алиев ҳам Эрдўғон ҳам Россия билан музокаралар ташкиллаштиришни таклиф қилишди ва мен уларнинг ушбу ташаббусини маъқуллайман», — деган Зеленский.

Зеленскийнинг айтишича, Озарбайжон президенти билан суҳбатда Илҳом Ҳайдарович Алиевни Украинанинг меҳрибон дўсти эканини таъкидлаб, унга мамлакатда нефть ва нефть маҳсулотлари танқислиги кузатилаётгани ҳақида гапириб берган.

«Дўстимиз Эрдўғонга ҳам Украина мустақиллиги ва ҳудудий яхлитлигини қўллаб-қувватлагани учун миннатдорлик билдираман», — дея қўшимча қилган Зеленский.

24 февралга ўтар кечаси Россия президенти Владимир Путин Донбассда «минтақа аҳолисини геноциддан ҳимоя қилиш» учун «махсус ҳарбий операция» бошланганини эълон қилди. Мурожаатдан сўнг ижтимоий тармоқларда Украинанинг кўплаб шаҳарларида портлашлар содир бўлгани ҳақида хабарлар пайдо бўлди. Украина Ички ишлар вазирлиги раҳбари маслаҳатчиси Антон Герашченко 24 февраль куни эрта тонгда Киев, Харьков ва Днепрда ҳарбий инфратузилма объектларига ракета зарбалари берилганини маълум қилди.

24 февралда Россия Украинага бостириб киргач, Буюк Британия мамлакатга қарши янги санкциялар қўллаган, хусусан «Аэрофлот» компаниясининг қироллик ҳудудига парвозларини тақиқлаган. АҚШ президенти Жо Байден Россия Украина ҳудудига бостириб киргани ва у ерда ҳарбий операцияларни бошлагани учун мамлакатга нисбатан янги санкциялар жорий қилган. Шунингдек, Байден Россиянинг Украинага ҳужуми учун масъулият Владимир Путиннинг зиммасида экани, Россия ушбу ҳарбий операция учун жиддий зарбалар қабул қилиб олиши ҳақида гапирган.

Кейинчалик 25 февралда АҚШ Путин, Лавров ва Шойгуга қарши санкциялар эълон қилди, шунингдек 26 февралда Оқ уйнинг Зеленскийга Киевни тарк этишида ёрдам беришга тайёрлиги хабар қилинди. АҚШ президенти Жо Байден Украинага ҳарбий эҳтиёжлар учун зудлик билан молиявий ёрдам кўрсатишни буюрган, Франция президенти Эммануэль Макрон эса Украинадаги урушнинг узоқ давом этишини тахмин қилган.