Rossiyaning Polsha hamda Irlandiyadagi elchixonalariga hujumlar uyushtirildi. Bu haqda diplomatik vakolatxonalarning matbuot xizmatlariga tayanib, “TASS” va “RIA Novosti” xabar qildi.
Varshavadagi elchixona press-attashesi Vladimir Aleksandrov elchixona xodimlari doimiy ravishda turli tahdidlarga uchrab kelganini qayd etgan.
“Bugun mahalliy vaqt bilan 05:30 da (Toshkent vaqtida bilan 09:30) bezori guruhlar diplomatik vakolatxonamizning asosiy kirish darvozasi “Rossiya Federatsiyasi elchixonasi” yozuvini bo‘yab ketgan. Shuningdek, elchixonaning orqa eshigi tomonidan binoga cho‘zma (rogatka)dan metall sharchalar otilgan, oqibatda turar joy binolarining uchta deraza oynasi singan”, — degan Aleksandrov.
Dublindagi Rossiya elchixonasi vakili ham diplomatik missiya binosiga hujum qilingani haqida xabar bergan. Uning so‘zlariga ko‘ra, elchixona binosi yonida uch kundan buyon norozilik namoyishlari o‘tkazilmoqda.
“Kechagi norozilik namoyishi vaqtida aksiya ishtirokchilari politsiya borligiga qaramay, Rossiya davlat gerbini yirtib tashladi va maslahatchi elchining mashinasiga hujum qildi”, — degan u.
Dublindagi diplomat 24-fevral kuni namoyishchilar elchixona binosidagi gerbni qizil rangli bo‘yoq bilan bejab ketganini ham tasdiqladi.
Rossiya armiyasining Ukrainaga qilgan hujumidan keyin butun dunyoda, shuningdek, Rossiyaning yirik shaharlarida norozilik namoyishlari o‘tkazilgan. Moskvada shahar ichki ishlar boshqarmasining axborotiga ko‘ra norozilik namoyishlari vaqtida 600 nafar odam hibsga olingan. Rossiya poytaxtida Pushkin maydonidagi namoyishchilarning ko‘pchiligi politsiya tomonidan qamoqqa tashlangan. Sankt-Peterburg, Yekaterinburg, Novosibirskda va boshqa shaharlarda ham namoyishlar bo‘lib o‘tgan.
Izoh (0)