Uzbekistan Airways Rostov-Don va Krasnodarga parvozlar bekor qilinganini ma’lum qildi. Bu haqda aviakompaniya axborot xizmati xabar qildi.
Qayd etilishicha, Rossiya Federatsiyasining Rostov-Don (Platov) va Krasnodar shaharlari xalqaro aeroportlarining faoliyati vaqtincha to‘xtatilgan. Shu munosabat bilan aviakompaniya quyidagi rejalashtirilgan muntazam qatnovlarni bekor qilgan.
- HY-9647/9648 Toshkent—Rostov-Don—Toshkent yo‘nalishida – 25, 27-fevral va 2-mart kunlari;
- HY-9687/9688 Toshkent—Krasnodar—Toshkent yo‘nalishida – 27-fevral va 1-mart kunlari;
- HY-3687/3688 Toshkent—Krasnodar—Toshkent yo‘nalishida – 2-mart kuni.
“To‘g‘ri tushunishingizga umid qilamiz”, — deyiladi Uzbekistan Airways xabarida.
24-fevralga o‘tar kechasi Rossiya prezidenti Vladimir Putin Donbassda “mintaqa aholisini genotsiddan himoya qilish” uchun “maxsus harbiy operatsiya” boshlanganini ma’lum qildi. Murojaatdan so‘ng ijtimoiy tarmoqlarda Ukrainaning ko‘plab shaharlarida portlashlar sodir bo‘lgani haqida xabarlar paydo bo‘ldi. Ukraina Ichki ishlar vazirligi rahbari maslahatchisi Anton Gerashchenko 24-fevral kuni erta tongda Kiyev, Xarkov va Dneprda harbiy infratuzilma obyektlariga raketa zarbalari berilganini ma’lum qildi.
Ukraina prezidenti Vladimir Zelenskiy Putinning harakatini mamlakatni yakson qilish deya baholab, G‘arbni “Putinga qarshi koalitsiya” tuzishga chaqirdi.
Shu munosabat bilan O‘zbekiston Ukrainadagi fuqarolarini evakuatsiya qilishga tayyorlanayotganini ma’lum qildi. Ta’kidlanishicha, Ukraina havo hududining yopilishini inobatga olgan holda jo‘nab ketish yo‘nalishlari va jo‘nab ketish joyi ishlab chiqilmoqda.
Namangandan Krasnodarga uchgan samolyot viloyatga qaytishga majbur bo‘ldi. Toshkentdan Kiyevga uchgan samolyot Moldovaga yo‘naltirildi. Keyinroq Uzbekistan Airways Kiyevga parvozlar bekor qilinganini ma’lum qildi.
Izoh (0)