Hozirda O‘zbekistonning Kiyevdagi elchixonasi tomonidan evakuatsiya rejasi va Ukraina hududini tark etishni xohlovchi fuqarolar ro‘yxati shakllantirilmoqda. Ukraina havo hududining yopilishini inobatga olgan holda jo‘nab ketish yo‘nalishlari va jo‘nab ketish joyi ishlab chiqilmoqda.Avvalroq Uzbekistan Airways’ning Namangandan Krasnodarga uchgan HY-9825 reysi Rostov viloyatidagi havo maydoni yo‘lovchi samolyotlarining qatnovlari uchun yopilishi munosabati bilan viloyatga majburiy qaytarilgani, Toshkentdan Kiyevga uchgan samolyot Moldovaga yo‘naltirilgani to‘g‘risida xabar berilgandi.Maqbul evakuatsiya yo‘nalishlari bo‘yicha masalalar uchinchi davlatlarning manfaatdor xizmatlari bilan kelishilgach, O‘zbekiston fuqarolari elchixonaning “Uzbekistan.org.ua” sayti va ijtimoiy tarmoqlardagi kanallarida qo‘shimcha ravishda xabardor qilinadi. Ukrainadan chiqib ketishni xohlovchi O‘zbekistonning barcha fuqarolari pasport ma’lumotlarini elchixonaning [email protected] elektron manziliga yuborishlari so‘raladi.
Ukrainada bo‘lgan O‘zbekiston fuqarolaridan tinchlik saqlashlarini va qo‘shimcha savollar tug‘ilganda elchixona bilan aloqada bo‘lishlarini so‘raymiz.
O‘zbekistonning Ukrainadagi elchixonasi
Mavzuga doir: “Dunyo kun sayin emas, soat sayin tahlikali bo‘lib boryapti” — Shavkat Mirziyoyev
Ma’lumot uchun, 24-fevralga o‘tar kechasi Rossiya prezidenti Vladimir Putin Donbassda “mintaqa aholisini genotsiddan himoya qilish” uchun maxsus harbiy operatsiya boshlanganini ma’lum qildi. Rossiyaliklarga murojaatida u Kreml Ukrainani demilitarizatsiya va denazolifikatsiya qilishga intilishi, biroq Ukraina hududlarini bosib olish rejada yo‘qligini aytdi.Putinning murojaatidan so‘ng ijtimoiy tarmoqlarda Ukrainaning ko‘plab shaharlarida portlashlar sodir bo‘lgani haqida xabarlar paydo bo‘ldi. Ukraina Ichki ishlar vazirligi rahbari maslahatchisi Anton Gerashchenko 24-fevral kuni erta tongda Kiyev, Xarkov va Dneprda harbiy infratuzilma obyektlariga raketa zarbalari berilganini ma’lum qildi. Rossiya Mudofaa vazirligi esa “Ukraina harbiy infratuzilmasi ishdan chiqarilayotganini”, mamlakatning tinch aholisiga hech qanday tahdid yo‘qligini e’lon qilgan.
