Ijtimoiy tarmoqda tarqalgan Zarafshon shahrida tarbiyachilar ko‘p qavatli uylarning podyezdlarini yuvishga jalb qilingani to‘g‘risida xabarlar tarqaldi. Navoiy viloyati Bandlik bosh boshqarmasining ma’lum qilishicha, mazkur holat Davlat mehnat inspeksiyasi tomonidan o‘rganilgan.
Aniqlanishicha, fuqarolar ko‘p qavatli uylarning zinapoyalarini tozalash ishlariga majburiy jalb etilgan. Zarafshon shahar maktabgacha ta’lim bo‘limi mudiriga Ma’muriy javobgarlik to‘g‘risidagi kodeksning 51-moddasiga (mehnatga ma’muriy tarzda majburlash) asosan ma’muriy jarima qo‘llangan. Ta’kidlanishicha, xodimlarning mehnat huquqlarini himoya qilish hamda qonun buzilishlarning oldini olish bo‘yicha tegishli ishlar amalga oshirilmoqda.
“Hurmatli yurtdoshlar, mehnat munosabatlariga oid murojaatlar yuzasidan Davlat mehnat inspeksiyasining 1176 qisqa raqamlariga, vazirlikning 71-200-06-00 ishonch telefoniga hamda ‘Dmi.mehnat.uz’ saytiga murojaat qilishingiz mumkin. Shaxsingiz sir saqlanishi kafolatlanadi”, — deyiladi xabarda.
Avvalroq Toshkent viloyatida maktab o‘quvchilari dars vaqtida majburiy mehnatga jalb etilgani, Andijonda uyida obodonlashtirish xodimlarini ishlatgan hokim o‘rinbosari 13,5 mln so‘m jarimaga tortilgani to‘g‘risida xabar berilgandi.
Izoh (0)