Uzbekistan Airways Kiyevga parvozlar bekor qilinganini ma’lum qildi
Uzbekistan Airways Ukraina havo hududi yo‘lovchi havo kemalari qatnovlari uchun yopilishi munosabati bilan Kiyevga parvozlar bekor qilinganini ma’lum qildi.
Kompaniya xabariga ko‘ra, HY-3731/3732 Toshkent—Kiyev—Toshkent muntazam qatnovlarining 27-fevral va 2-mart kunlari rejalashtirilgan parvozlari bekor qilinadi.
Bekor bo‘lgan parvozlar yo‘lovchilari aviachiptalarining to‘liq qiymatini chipta sotib olingan joyda qaytarib olishlari yoki parvozlar qayta tiklanganidan keyin boshqa sanaga bepul qayta bronlash huquqiga ega.
Uzbekistan Airways yo‘lovchilarni jadvaldagi har qanday o‘zgarishlar haqida qo‘shimcha ravishda xabardor qilishini bildirgan.
Eslatib o‘tamiz, 24-fevral kuni Uzbekistan Airways’ning Namangandan Krasnodarga uchgan HY-9825 reysi Rostov viloyatidagi havo maydoni yo‘lovchi samolyotlarining qatnovlari uchun yopilishi munosabati bilan viloyatga majburiy qaytarilgandi. Ortga qaytgan ushbu reys yonilg‘i yetarli bo‘lmagani sabab Urganchga qo‘ngani, yonilg‘i quyilgach Namanganga uchib ketishi ma’lum qilingandi.
Shuningdek, Sky Up Airlines aviakompaniyasining 24-fevral kuni Toshkentdan Kiyevga uchgan reysi Ukraina havo hududi barcha aviakompaniyalarning tijorat reyslari uchun yopilgani sabab Moldovaning Kishinyov xalqaro aeroportiga yo‘naltirildi.
