Toshkent tumanida hokimlik zaxirasidan 14 sotix yerni 8 ming dollar evaziga olib berishni va’da qilgan shaxs ushlandi

Toshkent viloyati Toshkent tumanida noqonuniy yer sotish holatiga chek qo‘yildi, deb xabar beradi Bosh prokuratura huzuridagi departament.

Ma’lum qilinishicha, departamentning Toshkent viloyati boshqarmasi tomonidan IIV xodimlari bilan hamkorlikda tezkor tadbir o‘tkazilgan. Tadbir davomida N.Sh. ismli shaxs fuqaro B.ning ishonchiga kirib, unga Toshkent tuman hokimligi zaxirasida bo‘lgan 14 sotix yer maydonini go‘yoki Z. ismli tanishi orqali 8 ming dollar evaziga unga egalik qilish huquqini beruvchi qarorni chiqartirib berishni va’da qilgani aniqlangan. U fuqaro B.dan 4 ming dollarni olgan vaqtida ashyoviy dalillar bilan ushlangan.

Mazkur holat yuzasidan Jinoyat kodeksining 168-moddasi (firibgarlik) va 28, 211-moddasi (pora berish) va bilan jinoyat ishi qo‘zg‘atilib, tergov harakatlari o‘tkazilmoqda.

Avvalroq Samarqandda 0,25 gektar yerni 24 ming dollarga sotishga uringan Kadastr agentligi xodimi va uning sherigi qo‘lga olingani, Toshkent viloyatida 13,7 gektar yerni 3,4 mln dollarga sotmoqchi bo‘lgan investitsiyalar va tashqi savdo boshqarmasi xodimi ushlangani, Toshkentda yerni noqonuniy olib bermoqchi bo‘lgan xonanda DXX tomonidan qo‘lga olingani to‘g‘risida xabar berilgandi.