Shavkat Mirziyoyev 21-fevral kuni “Avtotransport vositalarining ichki bozorini rivojlantirishni rag‘batlantirishga doir qo‘shimcha chora-tadbirlar to‘g‘risida”gi qarorni imzoladi. Bu haqda “Gazeta.uz” xabar qildi.
Kiritilgan o‘zgartirishlarga ko‘ra, avtomobillarni olib kirishdagi bojxona to‘lovlari stavkalari ikki bosqichda pasaytiriladi. Hujjat imzolangan paytdan boshlab 2023-yil 1-yanvarga qadar bojlar ikki yoki undan ortiq baravarga pasaytiriladi. Gap nafaqat bojni, balki avtomobilning dvigatel quvvatini hisobga olinadigan qo‘shimcha koeffitsientlarni kamaytirish haqida ham ketmoqda.
2023-yil 1-yanvardan bojxona stavkasi 15 foiz darajasida qoladi, qo‘shimcha koeffitsiyent ham pasaytiriladi.
Bundan tashqari, bojlar faqatgina O‘zbekiston chegarasidan olib o‘tish vaqtida ishlab chiqarilganiga bir yildan oshmagan yangi avtomobillarga taalluqli bo‘ladi (bungacha — 3 yildan oshmagan).
Eslatib o‘tamiz, 14-fevral kuni bo‘lib o‘tgan yig‘ilishda Shavkat Mirziyoyev Vazirlar Mahkamasiga to‘rt kun muddatda import avtomobillariga bojxona boji stavkalarini kamaytirish to‘g‘risidagi qaror loyihasini ishlab chiqishni topshirgan edi. Prezident, shuningdek, avtomobillar importi uchun bojxona bojlarini bosqichma-bosqich nol stavkaga qadar tushirish zarurligini ham ta’kidlagan edi.
Izoh (0)