O‘zbekiston yo‘llarida: Buxorodagi YTHda 3 kishi vafot etdi, Farg‘onada Nexia-3 lar to‘qnashdi

Mamlakatda so‘nggi kunlarda sodir bo‘lgan baxtsiz hodisalar tafsilotlarini taqdim etamiz.

Buxorodagi YTH oqibatida 3 kishi vafot etdi

2022-yilning 20-fevral kuni soat 22:10 larda R.A. ismli shaxs o‘z boshqaruvida bo‘lgan Cobalt rusumli avtomashinasini Buxoro shahar “Gulchorbog‘” mahallasidan o‘tuvchi 4R-69 A avtomobil yo‘li bo‘ylab, Buxoro aeroporti tomonidan Kogon tumani tomon boshqarib borib, yo‘lning 1-kilometriga yetganida o‘zidan oldinda u bilan bir yo‘nalishda harakatlanib borayotgan fuqaro J.Sh. boshqaruvidagi Matiz avtomashinasining orqa tomonidan urib, yo‘l-transport hodisasi sodir qilgan.

Transport hodisasida Cobalt qisqa tutashuv sabab yonib ketgan.

Oqibatda Matiz haydovchisi voqea joyida og‘ir tan jarohati olgan Matiz avtomashinasi yo‘lovchilari va Cobalt yo‘lovchisi kasalxonada vafot etgan.

Hozirda mazkur holat yuzasidan Jinoyat kodeksining 266-moddasi 3-qismi (odamlar o‘limiga sabab bo‘lgan transport boshqarish qoidalarini buzish) bilan jinoyat ishi qo‘zg‘atilib, dastlabki tergov harakatlari olib borilmoqda.

Farg‘onada Nexia-3 lar to‘qnashdi

2022-yilning 20-fevral kuni soat 23:30 larda Farg‘ona shahri Quvasoy ko‘chasida Y.R. (2000-yilda tug‘ilgan) Nexia-3 avtomobilni boshqarib ketayotib boshqaruvni yo‘qotgan. Shundan so‘ng yo‘lni ajratuvchi beton to‘siqdan o‘tib, qarama-qarshi yo‘nalishda harakatlanib kelayotgan K.X. (1998-yilda tug‘ilgan) boshqaruvidagi Nexia-3 avtomobili bilan to‘qnashuv sodir etgan.

Oqibatda K.X. boshqaruvidagi Nexia-3 yo‘lovchisi D.S. (1993-yilda tug‘ilgan) chap son suyagi yopiq sinishi tashxisi bilan tan jarohati olib, shifoxonaga murojaat qilgan.