Toshkentning Chilonzor tumanida 18-fevral kuni Inkuzart’ga tegishli turli formulalar bilan devorga chizilgan Albert Eynshteynning portreti bo‘yab tashlangani xabar qilingandi. Chilonzor tuman hokimligining ma’lum qilishicha, bunga tuman hokimining buyrug‘i sababchi emas.
Qayd etilishicha, graffiti o‘tgan yili yoz oylarida chizilgan. Vaqt o‘tishi bilan Eynshteynning surati va atrofidagi formulalar orasiga noma’lum shaxslar tomonidan axloq qoidalariga to‘g‘ri kelmaydigan ayrim so‘zlar va rasmlar chizib ketilgan. Ayrim joylarida esa giyohvandlik moddalarini sotish bilan shug‘ullanadigan saytlarning manzillari ham yozilgan. Bu aholining e’tirozlariga sabab bo‘lgani uchun surat shu yerda joylashgan mahalla raisi va “Hamkor kommunal servis” shirkati tomonidan bo‘yab qo‘yishga qaror qilingan.
“Ijtimoiy tarmoqlarda e’lon qilingan ayblovlarga umuman asos yo‘q. Shirkatga qarashli bo‘lgan hududdagi aholi e’tiroziga sabab bo‘layotgan joyni bo‘yab qo‘yish uchun tuman hokimining ruxsati va topshirig‘i talab etilmaydi”, — deyiladi xabarda.
Shu bois bu graffiti chizilgan devorni bo‘yash xususida tuman hokimi tomonidan hech qanday topshiriq va buyruq berilmagan. Bunday ishlarni MFY raisi va shirkat rahbari ham aholi bilan kelishgan holda hal etishi mumkin.
“Hokimlik tomonidan hech qanday buyruq bo‘lgani yo‘q. Kimlardir devorga yomon, uyatsiz so‘zlar yozib ketgani uchun o‘zimiz, mahalla faollari ruxsat berganmiz o‘chirishga”, — deydi shu hududda yashovchi ayol.
“Gazeta.uz” 19-fevralda e’lon qilgan xabarda esa Eynshteyn portreti aks etgan surat noqonuniy binoga chizilgani va bino “snos”ga tushgani uchun o‘chirilgani aytilgan. Xabarda qayd etilishicha, bu ma’lumotni nashrga Chilonzor tuman hokimiyati matbuot xizmati taqdim etgan. Tuman hokimining arxitektura, qurilish va kommunikatsiyalarni rivojlantirish masalalari bo‘yicha o‘rinbosari Abror Ahmedovning so‘zlariga ko‘ra, surat muallifiga “boshqa bir qulay joy” taklif etiladi.
Eslatib o‘tamiz, 2021-yilning sentabr boshida @inkuzart O‘zbekiston avtomobil bozoridagi monopoliyaga bag‘ishlangan strit-art chizgandi. Unda mashina uchun uzun navbat va navbat boshida qizil shapkali inson tasvirlangandi. Keyinroq ushbu tasvir to‘liq o‘chirib tashlangan, poytaxt hokimligi va “O‘zavtosanoat” bu ishga aloqasi yo‘qligini ma’lum qilgan edi. Noyabrda esa ko‘cha rassomining Toshkentda benzin narxi oshishiga bag‘ishlangan strit-art o‘chirib tashlangandi.
Izoh (0)