Тошкент туманида ҳокимлик захирасидан 14 сотих ерни 8 минг доллар эвазига олиб беришни ваъда қилган шахс ушланди

Тошкент вилояти Тошкент туманида ноқонуний ер сотиш ҳолатига чек қўйилди, деб хабар беради Бош прокуратура ҳузуридаги департамент.

Маълум қилинишича, департаментнинг Тошкент вилояти бошқармаси томонидан ИИВ ходимлари билан ҳамкорликда тезкор тадбир ўтказилган. Тадбир давомида Н.Ш. исмли шахс фуқаро Б.нинг ишончига кириб, унга Тошкент туман ҳокимлиги захирасида бўлган 14 сотих ер майдонини гўёки З. исмли таниши орқали 8 минг доллар эвазига унга эгалик қилиш ҳуқуқини берувчи қарорни чиқартириб беришни ваъда қилгани аниқланган. У фуқаро Б.дан 4 минг долларни олган вақтида ашёвий далиллар билан ушланган.

Мазкур ҳолат юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) ва билан жиноят иши қўзғатилиб, тергов ҳаракатлари ўтказилмоқда.

Аввалроқ Самарқандда 0,25 гектар ерни 24 минг долларга сотишга уринган Кадастр агентлиги ходими ва унинг шериги қўлга олингани, Тошкент вилоятида 13,7 гектар ерни 3,4 млн долларга сотмоқчи бўлган инвестициялар ва ташқи савдо бошқармаси ходими ушлангани, Тошкентда ерни ноқонуний олиб бермоқчи бўлган хонанда ДХХ томонидан қўлга олингани тўғрисида хабар берилганди.