Farg‘onadagi metan zapravkalar 24 soatlik ish rejimiga o‘ta boshladi. Avvalroq zapravkalarda turnaqator navbatlar kuzatilayotgani xabar qilingandi

Farg‘ona viloyatidagi metan zapravkalar 24 soatlik ish rejimiga o‘ta boshladi, deya xabar berdi “Daryo” muxbiri.

Viloyatdagi metan zapravkalar bugun, 21-fevral kuni ham soat 15:00 da faoliyatini to‘xtatgan bo‘lsa-da, soat 21:00 da yana faoliyatini davom ettirgan.

“Tasodifan yana gaz berilayotganini ko‘pchilik haydovchilar bilishmasa kerak. Boisi gaz zapravkada hech kim yo‘q deyarli. Hech qanday muammosiz gaz oldik”, — deydi “Daryo muxbiri bilan suhbatlashgan haydovchilarning biri.

Viloyatning Oltiariq, Rishton tumani, shuningdek, Farg‘ona shahrida bo‘lgan “Daryo” muxbiri aksariyat zapravkalarda hech qanday navbat yo‘qligini yozmoqda.

“Ammo Farg‘ona shahridagi ba’zi zapravkalar haliyam ish boshlagani yo‘q. Zapravkalar oldida haliyam mashinalar navbat kutishayotganini ko‘rdim. Menimcha, haydovchilarning aksariyati hali yangilikdan xabar topmagan ko‘rinadi”, — deydi Farg‘ona shahrida yashovchi haydovchilardan biri.

Eslatib o‘tamiz, avvalroq “Daryo”da viloyatdagi metan zapravkalar faoliyatida cheklov o‘rnatilgani bois haydovchilar sarson bo‘layotgani, hatto gaz zapravkalarda tunab qolishga majbur bo‘layotgani ma’lum qilingandi.