Тошкентнинг Чилонзор туманида 18 февраль куни Inkuzart’га тегишли турли формулалар билан деворга чизилган Алберт Эйнштейннинг портрети бўяб ташлангани хабар қилинганди. Чилонзор туман ҳокимлигининг маълум қилишича, бунга туман ҳокимининг буйруғи сабабчи эмас.
Қайд этилишича, граффити ўтган йили ёз ойларида чизилган. Вақт ўтиши билан Эйнштейннинг сурати ва атрофидаги формулалар орасига номаълум шахслар томонидан ахлоқ қоидаларига тўғри келмайдиган айрим сўзлар ва расмлар чизиб кетилган. Айрим жойларида эса гиёҳвандлик моддаларини сотиш билан шуғулланадиган сайтларнинг манзиллари ҳам ёзилган. Бу аҳолининг эътирозларига сабаб бўлгани учун сурат шу ерда жойлашган маҳалла раиси ва «Ҳамкор коммунал сервис» ширкати томонидан бўяб қўйишга қарор қилинган.
«Ижтимоий тармоқларда эълон қилинган айбловларга умуман асос йўқ. Ширкатга қарашли бўлган ҳудуддаги аҳоли эътирозига сабаб бўлаётган жойни бўяб қўйиш учун туман ҳокимининг рухсати ва топшириғи талаб этилмайди», — дейилади хабарда.
Шу боис бу граффити чизилган деворни бўяш хусусида туман ҳокими томонидан ҳеч қандай топшириқ ва буйруқ берилмаган. Бундай ишларни МФЙ раиси ва ширкат раҳбари ҳам аҳоли билан келишган ҳолда ҳал этиши мумкин.
«Ҳокимлик томонидан ҳеч қандай буйруқ бўлгани йўқ. Кимлардир деворга ёмон, уятсиз сўзлар ёзиб кетгани учун ўзимиз, маҳалла фаоллари рухсат берганмиз ўчиришга», — дейди шу ҳудудда яшовчи аёл.
«Gazeta.uz» 19 февралда эълон қилган хабарда эса Эйнштейн портрети акс этган сурат ноқонуний бинога чизилгани ва бино «снос»га тушгани учун ўчирилгани айтилган. Хабарда қайд этилишича, бу маълумотни нашрга Чилонзор туман ҳокимияти матбуот хизмати тақдим этган. Туман ҳокимининг архитектура, қурилиш ва коммуникацияларни ривожлантириш масалалари бўйича ўринбосари Аброр Аҳмедовнинг сўзларига кўра, сурат муаллифига «бошқа бир қулай жой» таклиф этилади.
Эслатиб ўтамиз, 2021 йилнинг сентябрь бошида @inkuzart Ўзбекистон автомобиль бозоридаги монополияга бағишланган стрит-арт чизганди. Унда машина учун узун навбат ва навбат бошида қизил шапкали инсон тасвирланганди. Кейинроқ ушбу тасвир тўлиқ ўчириб ташланган, пойтахт ҳокимлиги ва «Ўзавтосаноат» бу ишга алоқаси йўқлигини маълум қилган эди. Ноябрда эса кўча рассомининг Тошкентда бензин нархи ошишига бағишланган стрит-арт ўчириб ташланганди.
Изоҳ (0)