“Turizm, madaniy meros va sport sohalarida davlat boshqaruvini takomillashtirishga doir tashkiliy chora-tadbirlar to‘g‘risida”gi prezident farmoni qabul qilindi. Hujjat matni O‘zAda e’lon qilindi.
Qayd etilishicha, farmonga binoan yangi yondashuvlar asosida turizm va sport sohalaridagi boshqaruv sifati yanada oshiriladi. Buning uchun Turizm va sport vazirligi negizida Turizm va madaniy meros vazirligi, Sportni rivojlantirish vazirligi tashkil etilishi hamda bu vazirliklarning yo‘nalishlari belgilandi.
Shuningdek, endilikda bosh vazir o‘rinbosari – turizm va sport vaziri lavozimi bosh vazir o‘rinbosari – turizm va madaniy meros vaziri lavozimi etib qayta nomlanadi.
“Turizm va madaniy meros vazirligi faoliyatini tashkil etish to‘g‘risida”gi qaror bilan vazirlik tizimida necha nafar xodim ishlashi belgilandi. Unga ko‘ra, Turizm va madaniy meros vazirligi markaziy apparatining boshqaruv xodimlari cheklangan soni 84 nafar, vazirlikning hududiy bo‘linmalari boshqaruv xodimlarining cheklangan soni esa 386 nafar bo‘ladi.
Shavkat Mirziyoyev, bundan tashqari, “Sportni rivojlantirish vazirligi faoliyatini tashkil etish to‘g‘risida”gi qarorni ham imzoladi. Unda aytilishicha, Sportni rivojlantirish vazirligi markaziy apparatining boshqaruv xodimlari cheklangan soni 76 nafar, vazirlikning hududiy bo‘linmalari boshqaruv xodimlarining cheklangan soni 594 nafar etib belgilangan.
Eslatib o‘tamiz, Oliy Majlis Qonunchilik palatasining 18-fevral kuni bo‘lib o‘tgan majlisida Turizm va sport vazirligini alohida Turizm va madaniy meros hamda Sportni rivojlantirish vazirliklariga ajratish masalasi ko‘rib chiqilgan.
Shavkat Mirziyoyev shu munosabat bilan tayinlovlar amalga oshirgan. Qayd etilishicha, prezidentning tegishli farmonlari bilan Aziz Abduhakimov bosh vazirning o‘rinbosari — turizm va madaniy meros vaziri lavozimiga, Adham Ikramov sportni rivojlantirish vaziri lavozimiga tayinlandi.
Izoh (0)