Bayden Ukrainaga hujum amalga oshirilmasa, Putin bilan uchrashishga tayyorligini ma’lum qildi

AQSh prezidenti Jo Bayden Ukrainaga nisbatan bosqinchilik harakatlari amalga oshirilmasa, Rossiya prezidenti Vladimir Putin bilan uchrashishga tayyor. Bu haqda Oq uy matbuot kotibi Jen Psaki ma’lum qildi.

Psakining eslatishicha, AQSh davlat kotibi Entoni Blinken va Rossiya tashqi ishlar vaziri Sergey Lavrov shu hafta Yevropada uchrashuv o‘tkazishi kerak.

“Prezident Bayden agarda hujum amalga oshirilmasa, ushbu muzokaralardan keyin (Blinken va Lavrov — tahr.) prezident Putin bilan uchrashishga tayyor”, — deydi Psaki.

O‘z navbatdaiga Yelisey saroyining ma’lum qilishicha, 20-fevral kuni Putin va Bayden bilan telefon orqali muloqot qilgan Fransiya yetakchisi Emmanuel Makron rossiyalik va amerikalik hamkasblariga “Yevropada xavfsizlik va strategik barqarorlik masalalari bo‘yicha” ikki tomonlama sammit o‘tkazish taklifini bergan. Makron administratsiyasining ta’kidlashicha, davlat rahbarlari mazkur taklifga rozi bo‘lgan. Muzokaralar uchun asos Lavrov va Blinken tomonidan 24-fevral kuni o‘tkazilishi kutilayotgan uchrashuv davomida tayyorlanadi.

Eslatib o‘tamiz, 12-fevral kuni Rossiya prezidenti Vladimir Putin va AQSh prezidenti Jo Bayden telefon orqali muloqot qilgandi. Suhbat chog‘ida Bayden Vashington Ukraina atrofidagi keskinlikni diplomatik yo‘l bilan tartibga solishga ham, “boshqa ssenariylarga” ham tayyor ekanini aytgan. Shu kuni Baydendan avval Putin Fransiya prezidenti Emmanuel Makron bilan ham telefon orqali gaplashgan. Ularning suhbati 1 soat-u 40 daqiqa davom etgan. Muzokaralar Ukraina atrofidagi vaziyatning keskinlashuviga bag‘ishlangan. Muzokaralardan so‘ng Yelisey saroyi bergan bayonotda aytilishicha, Putinning gaplari Rossiyaning Ukrainaga hujum qilishga tayyorligidan dalolat bermagan.