Yevropaning bir qancha davlatlariga urilgan “Yunis” dovuli 16 kishining o‘limiga sabab bo‘ldi, deb yozmoqda BBC News.
Xususan, Niderlandiyada to‘rt kishi, Polshada ham to‘rt kishi halok bo‘lgan. Buyuk Britaniyada uch nafar, Germaniya va Belgiyada ikki nafardan, Irlandiyada bir kishi yomon ob-havo qurboni bo‘lgan. O‘limlarning aksariyati daraxtlar qulashi va kuchli shamolda konstruksiyalarning uchib kelib urilishi bilan bog‘liq.
Euronews ma’lumotlariga ko‘ra, dovul Irlandiyadan Buyuk Britaniyaga, so‘ngra Fransiya shimoli va Benilyuks mamlakatlari orqali Daniya va Germaniyaga ko‘chgan (u yerda dovulga Zeynep nomi berilgan). Dovul elektr uzatish liniyalarining uzilishiga, binolarning vayron bo‘lishiga va sohilbo‘yi hududlarini suv bosishiga olib kelgan.
Dovulning kuchli zarbasi ayniqsa Buyuk Britaniyaga urilgan: Londonda ob-havo yomonlashishining qizil darajasidan ogohlantirish e’lon qilindi. Sky News ma’lumotlariga ko‘ra, Buyuk Britaniyada 18-fevral kuni kuzatilgan dovul tufayli 1,2 million kishi elektr ta’minotidan uzilgan, ulardan 155 ming nafari haligacha elektrsiz qolmoqda.
18-fevral kuni Gatvik, Xitrou va Manchester aeroportlarida 500 dan ortiq reyslar bekor qilingan edi. 20-fevral kuni The Guardian aeroportlar qayta ochilayotganini xabar qildi.
20—21-fevral kunlari Buyuk Britaniyada kuchli shamollardan ogohlantirish rejimi kuchda qolmoqda. Kelgusi hafta oxirigacha mamlakatda shamolli ob-havo, yog‘ingarchilik kutilmoqda.
Izoh (0)