NATO Ukrainadagi xodimlarini poytaxt Kiyevdan Lvov shahriga ko‘chirishga qaror qildi, xodimlarning bir qismi Bryusselga ko‘chib o‘tadi. Bu haqda alyans matbuot xizmatiga tayanib, Norvegiyaning VG telekanali xabar berdi.
Alyans va ittifoqchi davlatlar Ukrainadagi vaziyatni kuzatmoqda va zaruriy ehtiyot choralarini ko‘rmoqda, deya xabar beradi blokning matbuot xizmati.
“Xodimlarimiz xavfsizligi birinchi o‘rinda turadi, shuning uchun ular Lvov va Bryusselga ko‘chirildi. Shu tariqa NATOning Ukrainadagi vakolatxonalari ishlashda davom etmoqda”, — deya qo‘shimcha qilingan xabarda.
Fevral oyi o‘rtalarida AQSh Ukrainadagi elchixonasini vaqtincha Kiyevdan Lvovga ko‘chirgandi. Davlat kotibi Entoni Blinkenning so‘zlariga ko‘ra, bunday chora “Rossiya kuchlarining Ukraina bilan chegarada sezilarli darajada to‘planishi” fonida diplomatik missiya “xodimlarining xavfsizligi uchun” qabul qilingan. AQSh ortidan Buyuk Britaniya Ukrainadagi elchixonasini Lvovga ko‘chirishga qaror qilgan. Avstraliya va Kanada ham xuddi shunday choralar ko‘rgan.
Bu orada Germaniyaning Lufthansa aviakompaniyasi 21—28-fevral kunlari Kiyevga parvozlarni to‘xtatishini e’lon qildi. Aviakompaniya Odessaga ham parvozlarni amalga oshirmaydi. Lufthansa vaziyatni doimiy ravishda kuzatib borishini va keyingi parvozlar haqida hali yana qaror qabul qilishini bildirgan.
Bir vaqtning o‘zida, Avstriyaning Austrian Airlines aviakompaniyasi ham Kiyev va Odessaga parvozlarni 20-fevraldan oy oxirigacha to‘xtatishini ma’lum qildi.
19-fevral kuni Germaniya va Avstriya hukumati o‘z fuqarolarini ehtimoliy Rossiya bosqini tufayli Ukrainani tark etishga chaqirgandi. Fevral oyi boshida Niderlandiyaning KLM aviakompaniyasi xuddi shunday sabab bilan Ukrainaga parvozlarni to‘xtatgan edi.
Izoh (0)