Rossiya prezidenti Vladimir Putin Germaniya kansleri Olaf Shols bilan o‘tkazilgan muzokaralardan keyin mamlakatning urush chiqishini istamasligi, shu sababli Moskva AQSh hamda NATOga xavfsizlik kafolatlari borasida o‘z takliflarini bildirganini qayd etdi. Bu haqda “RBK” xabar berdi.
“Biz urush chiqishini istaymizmi? Albatta yo‘q, bunday bo‘lishini xohlamaymiz”, — deya ta’kidlagan Putin Yevropada urush chiqishiga qarshi tura olishi haqida berilgan savolga javoban.
“Aynan shu sababdan o‘z takliflarimizni muzokaralar jarayoniga taqdim etdik, ularning natijasi o‘laroq barchaga, jumladan, bizning mamlakat uchun ham xavfsizlikni ta’minlashga erishish mumkin”, — degan Rossiya prezidenti.
Vladimir Putin G‘arb bilan muloqot kelgusida ham davom etishi va Moskva uchun o‘ta muhim masalalar muhokama qilinishiga umidi borligini qo‘shimcha qildi.
Shuningdek, Putin Sholsning uning avlodi Yevropada keng miqyosli urush chiqishini tasavvur qila olmasligi haqida aytgan gaplariga munosabat bildirgan.
“Bu Ukraina atrofidagi vaziyat misolida aytildi. Lekin biz siz bilan NATO bloki tomonidan Yugoslaviyada avj oldirilgan urushning guvohi bo‘lganmiz. Katta harbiy operatsiya vaqtida Yevropa poytaxtlaridan biri bo‘lgan Belgradga harbiy bomba zarbalari berilgan. Axir shunday bo‘lgan. BMT Xavfsizlik kengashi esa bunga sanksiyalar qo‘llamagan. Bu juda yomon misol, ammo tarixda bo‘lgan voqea-hodisalar”, — deydi Putin.
O‘z navbatida Shols urush boshlanmasligi kerakligi, Ukraina atrofidagi harbiylarni boshqa joyga olib o‘tish zarurligini qayd etdi. Germaniya kansleri Ukraina atrofidagi vaziyatni Yugoslaviyadagi urush bilan taqqoslashdan bosh tortdi. Uning fikricha, Janubiy Slavyan davlatlarida genotsid xavfi bo‘lgan.
“Bizning hisob-kitoblarga ko‘ra, hozir Donbassda bo‘layotgan voqealar ham aslida genotsid”, — deya Sholsga javob qaytargan Putin.
Eslatib o‘tamiz, 15-fevralda Rossiya Ukraina bilan chegara hududida o‘quv mashg‘ulotlari o‘tkazgan harbiylarning bir qismini boshqa joyga ko‘chirgan.
Avvalroq Rossiya prezidentining matbuot kotibi Dmitriy Peskov Putinning Ukraina masalasida muzokaralarga tayyorligini ma’lum qilgandi.
Izoh (0)