Buyuk Britaniya Kiyevdagi diplomatik xodimlarining bir qismini Ukraina g‘arbiga ko‘chirdi. Bu haqda qirollik TIV rahbari Liz Trassga tayanib, Reuters xabar berdi.
Shu bilan birga, u Kiyevdagi diplomatik aloqalar saqlanib qolishiga aniqlik kiritgan.
“Biz Yevropada urush yoqasiga borib qolishimiz mumkin”, — deya hisoblaydi Trass. Britaniya tashqi ishlar vazirining so‘zlariga ko‘ra, u Rossiya “Ukraina bilan cheklanib qolmasligidan” xavotirda. Vazir Sharqiy Yevropadagi boshqa mamlakatlarga hujum uyushtirilishi mumkinligini istisno etmagan, bu esa “boshqa tajovuzkorlarning” ambitsiyalarini rag‘batlantirishi mumkin.
Trassning Britaniya razvedkasiga tayanib ta’kidlashicha, prezident Vladimir Putin “hujum qilish” bo‘yicha hali qaror qabul qilmagan. Shunga qaramay, Ukrainaga hujum “juda tez” va “boshqa bayroq ostida” amalga oshirilishi mumkin. U London eng yomonini kutayotganini qo‘shimcha qilgan.
Bir kun avval Trass britaniyaliklarni tijoriy reyslar mavjudligida Ukrainani zudlik bilan tark etishga chaqirgandi. 14-fevral kuni AQSh Ukrainadagi elchixonasini Kiyevdan Lvovga ko‘chirishi ma’lum bo‘ldi. Diplomatik missiyaning kompyuter va tarmoq qurilmalari yo‘q qilinadi.
Tobora taranglashib borayotgan Rossiya—Ukraina o‘rtasidagi vaziyat ortidan ko‘plab mamlakatlar o‘z fuqarolarini Ukrainani zudlik bilan tark etishga chaqirmoqda. 10-fevralda AQSh davlat departamenti fuqarolarga Ukrainaga bormaslik yoki zudlik bilan Rossiya harbiy harakatlari xavfi bo‘lgan va COVID-19 bilan kasallanishlar ko‘paygan hududdan ketishni tavsiya etdi. AQSh prezidenti Jo Bayden Ukrainadagi barcha amerikaliklarni hoziroq mamlakatdan ketishga chaqirdi. AQShdan keyin Niderlandiya, Chernogoriya, Yaponiya, Latviya, Buyuk Britaniya va Janubiy Koreya ham fuqarolaridan Ukrainaga bormaslikni so‘radi.
Izoh (0)