Avstraliyalik hamshiralar ish haqining pastligi va og‘ir mehnat sharoiti ustidan norozilik bildirib, ko‘chalarga chiqdi, deb yozadi Daily Mail.
Avstraliyaning Yangi Janubiy Uels shtatida davlat shifoxonalari va klinikalarining bir necha ming xodimlari ish haqini oshirish va ishchilar xavfsizligini talab qilib, ish tashlashga qo‘shildi.
Shtatning hamshiralar va akusherlar assotsiatsiyasi (NSWNMA) ma’lum qilishicha, ish tashlashni mintaqadagi o‘qituvchilar kasaba uyushmalari va Avstraliya Birlashgan ittifoqi qo‘llab-quvvatlagan.
Qayd etilishicha, hamshiralar va akusherlar Yangi Janubiy Uels bosh vaziri Dominik Perrot tibbiyot xodimlarining xavfsizlik talablari buzilgani haqidagi shikoyatlarini tinglab, COVID-19 pandemiyasi tufayli davlat shifoxonalari, poliklinikalar va tug‘ruqxonalarda kadrlar yetishmovchiligi kuchayganiga e’tibor qaratishiga umid bildirgan.
Bundan tashqari, davlat poliklinikalari xodimlari pandemiya davrida hamshiralar va sanitarlarning ish yuki sezilarli darajada oshgani va koronavirus yuqtirib olish xavfiga qaramay, ishlashda davom etganini ta’kidlab, hukumat va’da qilganidek ish haqini 2,5 foizdan yuqoriga oshirishni talab qilmoqda.
Mintaqa sog‘liqni saqlash vazirligi ma’lumotlariga ko‘ra, ish tashlashda o‘nlab davlat shifoxonalarining kamida 5 ming hamshira va akusherlari ishtirok etgan, biroq ularning aksariyati tushlikdan so‘ng xizmatga qaytgan.
Izoh (0)