Россия президенти Владимир Путин Германия канцлери Олаф Шольц билан ўтказилган музокаралардан кейин мамлакатнинг уруш чиқишини истамаслиги, шу сабабли Москва АҚШ ҳамда НАТОга хавфсизлик кафолатлари борасида ўз таклифларини билдирганини қайд этди. Бу ҳақда «РБК» хабар берди.
«Биз уруш чиқишини истаймизми? Албатта йўқ, бундай бўлишини хоҳламаймиз», — дея таъкидлаган Путин Европада уруш чиқишига қарши тура олиши ҳақида берилган саволга жавобан.
«Айнан шу сабабдан ўз таклифларимизни музокаралар жараёнига тақдим этдик, уларнинг натижаси ўлароқ барчага, жумладан, бизнинг мамлакат учун ҳам хавфсизликни таъминлашга эришиш мумкин», — деган Россия президенти.
Владимир Путин Ғарб билан мулоқот келгусида ҳам давом этиши ва Москва учун ўта муҳим масалалар муҳокама қилинишига умиди борлигини қўшимча қилди.
Шунингдек, Путин Шольцнинг унинг авлоди Европада кенг миқёсли уруш чиқишини тасаввур қила олмаслиги ҳақида айтган гапларига муносабат билдирган.
«Бу Украина атрофидаги вазият мисолида айтилди. Лекин биз сиз билан НАТО блоки томонидан Югославияда авж олдирилган урушнинг гувоҳи бўлганмиз. Катта ҳарбий операция вақтида Европа пойтахтларидан бири бўлган Белградга ҳарбий бомба зарбалари берилган. Ахир шундай бўлган. БМТ Хавфсизлик кенгаши эса бунга санкциялар қўлламаган. Бу жуда ёмон мисол, аммо тарихда бўлган воқеа-ҳодисалар», — дейди Путин.
Ўз навбатида Шольц уруш бошланмаслиги кераклиги, Украина атрофидаги ҳарбийларни бошқа жойга олиб ўтиш зарурлигини қайд этди. Германия канцлери Украина атрофидаги вазиятни Югославиядаги уруш билан таққослашдан бош тортди. Унинг фикрича, Жанубий Славян давлатларида геноцид хавфи бўлган.
«Бизнинг ҳисоб-китобларга кўра, ҳозир Донбассда бўлаётган воқеалар ҳам аслида геноцид», — дея Шольцга жавоб қайтарган Путин.
Эслатиб ўтамиз, 15 февралда Россия Украина билан чегара ҳудудида ўқув машғулотлари ўтказган ҳарбийларнинг бир қисмини бошқа жойга кўчирган.
Аввалроқ Россия президентининг матбуот котиби Дмитрий Песков Путиннинг Украина масаласида музокараларга тайёрлигини маълум қилганди.
Изоҳ (0)