O‘zbekiston yo‘llarida sodir bo‘lgan baxtsiz hodisalar tafsilotlarini taqdim etamiz.
Jizzaxda Lacetti jarlikka qulab tushdi
Jizzax viloyatining Baxmal tumanida Laсetti avtomobili katta jarlikdan qulab tushgani aytilmoqda. Bu haqda “Daryo” o‘quvchilaridan biri ma’lum qildi.
Qayd etilishicha, voqea kecha, 13-fevral kuni tungi soat 23:00—23:30 atrofida sodir bo‘lgan.Voqea haqida aytib bergan “Daryo” o‘quvchisining qo‘shimcha qilishicha, voqea sodir bo‘lgan joy Samarqand viloyatining Bulung‘ur tumani hamda Baxmal tumani oralig‘idagi Do‘smat qishlog‘idagi jarlik hisoblanadi.
“Bu yerda qishloq to‘ylarining ko‘pkarisi o‘tkaziladigan tepalik bor. Voqea aynan shu tepalik oldidagi jarlikda sodir bo‘lgan”, — deydi u.
Videodan anglashilishicha, voqea joyiga kechasi soat 23:30 da yetib kelgan fuqaro avtomobildagilarning baqir-chaqir ovozini eshitgan.
“Men kechasi soat o‘n bir yarimda voqea joyiga kelganimda, rosa baqir-chaqir ovozini eshitdim”, — deydi videoda ko‘ringan fuqarolardan biri.
Video muallifi avtomobil qaysi jarlikdan qulaganini ham ko‘rsatgan bo‘lib, jarlikning balandligi taxminan 150—170 metrni tashkil qiladi.
Voqea haqida rasmiy ma’lumot berilmagan.
Navoiyda Cobalt ham pastlikka tushib ketdi
2022-yil 14-fevral kuni soat 16:00 larda Navoiy viloyati Xatirchi tumani “Navbahor” MFY hududidan o‘tgan 4P-56a avtomobil yo‘lining 2-kilometrida haydovchi (1990-yilda tug‘ilgan) F.P. Xatirchi–Oltinsoy yo‘nalishida Cobalt rusumli avtomobilda harakatlanayotib boshqaruvni yo‘qotishi oqibatida yo‘ldan chiqib ketib, transport vositasi pastlikka tushib ketgan.
Ushbu hodisa oqibatida tan jarohati olgan fuqarolar yo‘q.
Mazkur YTH yuzasidan Xatirchi tumani IIB YHXB xodimlari tomonidan surishtiruv olib borilmoqda.
Izoh (0)