Qashqadaryo viloyatining Koson tumanida katta tezlikda harakatlangan Lacetti qurilish ishlari olib borilayotgan ko‘prikdan qulab tushdi. Bu haqda “Sevimli” telekanalining “Zamon” informatsion dasturida xabar berildi.
Ma’lum bo‘lishicha, voqea 8-oktabr kuni soat 2:00 larda davlat ahamiyatiga ega bo‘lgan 4R-95 Koson—Sho‘rbozor avtomobil yo‘lining Koson tumani Ushoqtepa qishlog‘idan o‘tgan 8-kilometrida sodir bo‘lgan. Zovur ustida 1980-yilda qurilgan ko‘prikni 1-sentabrdan buyon qayta qurish ishlari olib borilayotgan bo‘lgan.
Lacetti haydovchisi harakatlanib kelayotib, Ushoqtepa qishlog‘i hududida ta’mirlash ishlari olib borilayotgan ko‘prikdan pastga tushib ketgan. Oqibatda haydovchi og‘ir tan jarohatlari olib, voqea joyida vafot etgan.
Hozirda hodisa yuzasidan Koson tumani IIB huzuridagi tergov bo‘limi tomonidan tergovga qadar surishtiruv ishlari olib borilmoqda.
Bundan avval Qashqadaryo viloyatining Dehqonobod tumanida harakatlanib ketayotgan Nexia boshqaruvni yo‘qotib, 15 metr chuqurlikdagi jarlikka qulab tushgani haqida xabar berilgan edi. Haydovchi YTHda omon qolgan.
