FIFA tartib-intizom qo‘mitasi 2021-yilning 5-sentabr kuni bo‘lib o‘tishi kerak bo‘lgan Braziliya va Argentina terma jamoalari o‘rtasidagi JCh—2022 saralash o‘yini bo‘yicha yakuniy qaror qabul qildi.
Qayd etilishicha, o‘yin takroran o‘tkaziladi. Bellashuv sanasi va joyini FIFA belgilaydi. Tartib-intizom qo‘mitasi o‘yinning bekor qilinishiga uni tashkil etishda ishtirok etgan tomonlarning yetarli darajada sifatli ishlamagani tufayli shunday qarorga kelganini ta’kidlamoqda. Shu munosabat bilan quyidagi qarorlar qabul qilingan:
- 1. Braziliya futbol federatsiyasi tartib va xavfsizlik bilan bog‘liq qoidabuzarliklar uchun 500 ming Shveysariya franki (taxminan, 477 ming yevro) jarimaga tortildi;
- 2. Argentina futbol assotsiatsiyasi tartib va xavfsizlik, o‘yinga tayyorgarlik va ishtirok etish bo‘yicha majburiyatlarni bajarmagani uchun 200 ming Shveysariya franki (taxminan, 190 000 yevro) miqdorida jarimaga tortildi;
- 3. Uchrashuv bekor qilingani uchun Braziliya futbol federatsiyasi va Argentina futbol assosiatsiyasi 50 ming Shveysariya frankidan (deyarli 48 ming yevro) to‘laydi;
- 4. Argentina terma jamoasi futbolchilari Emiliano Buendiya, Emiliano Martines, Jovani Lo Chelso va Kristian Romero FIFA shafeligida o‘tkaziladigan 2 ta o‘yinga diskvalifikatsiya qilindi.
Braziliya sog‘liqni nazorat qilish tashkiloti (Anvisa) qaroriga ko‘ra, mamlakatda Buyuk Britaniyadan kelgan fuqarolar uchun 14 kunlik karantin joriy qilingan. Anvisa’ning qayd etishicha, yuqorida ismlari keltirilgan futbolchilar hukumatni Buyuk Britaniyaga yaqin orada bormagani haqidagi soxta hujjat bilan aldashga uringan.
Anvisa tartibbuzarlarni ushlash va deportatsiya qilishni so‘rab, politsiyaga murojaat qilgan. Biroq politsiya xodimlari mehmonxonaga borgan vaqtda futbolchilar o‘yinga jo‘nab ketib bo‘lgan.
Izoh (0)