ФИФА тартиб-интизом қўмитаси 2021 йилнинг 5 сентябрь куни бўлиб ўтиши керак бўлган Бразилия ва Аргентина терма жамоалари ўртасидаги ЖЧ—2022 саралаш ўйини бўйича якуний қарор қабул қилди.
Қайд этилишича, ўйин такроран ўтказилади. Беллашув санаси ва жойини ФИФА белгилайди. Тартиб-интизом қўмитаси ўйиннинг бекор қилинишига уни ташкил этишда иштирок этган томонларнинг етарли даражада сифатли ишламагани туфайли шундай қарорга келганини таъкидламоқда. Шу муносабат билан қуйидаги қарорлар қабул қилинган:
- 1. Бразилия футбол федерацияси тартиб ва хавфсизлик билан боғлиқ қоидабузарликлар учун 500 минг Швейцария франки (тахминан, 477 минг евро) жаримага тортилди;
- 2. Аргентина футбол ассоциацияси тартиб ва хавфсизлик, ўйинга тайёргарлик ва иштирок этиш бўйича мажбуриятларни бажармагани учун 200 минг Швейцария франки (тахминан, 190 000 евро) миқдорида жаримага тортилди;
- 3. Учрашув бекор қилингани учун Бразилия футбол федерацияси ва Аргентина футбол ассосиацияси 50 минг Швейцария франкидан (деярли 48 минг евро) тўлайди;
- 4. Аргентина терма жамоаси футболчилари Эмилиано Буэндия, Эмилиано Мартинес, Джовани Ло Чельсо ва Кристиан Ромеро ФИФА шафелигида ўтказиладиган 2 та ўйинга дисквалификация қилинди.
Бразилия соғлиқни назорат қилиш ташкилоти (Анвиса) қарорига кўра, мамлакатда Буюк Британиядан келган фуқаролар учун 14 кунлик карантин жорий қилинган. Анвисаънинг қайд этишича, юқорида исмлари келтирилган футболчилар ҳукуматни Буюк Британияга яқин орада бормагани ҳақидаги сохта ҳужжат билан алдашга уринган.
Анвиса тартиббузарларни ушлаш ва депортация қилишни сўраб, полицияга мурожаат қилган. Бироқ полиция ходимлари меҳмонхонага борган вақтда футболчилар ўйинга жўнаб кетиб бўлган.
Изоҳ (0)