2021-yilning yozida o‘tkazilgan Yevropa chempionatida butun futbol olamini qo‘rqitib yuborgan Kristian Eriksen 14-fevral kuni 30 yoshni qarshiladi. Quyida daniyalik futbolchining Yevro—2020 dagi yurak xurujidan keyin nimalar qilgani va qanday qilib katta sportga qaytgani haqida hikoya qilinadi.
Eriksen yetti oy oldin maydonda yuragi to‘xtab qolganida faoliyatini yakunlash haqida o‘ylayotgandi. Endi esa APLda o‘ynaydi
Kristian Eriksen katta futbolga qaytdi. O‘tgan yozda, Yevro—2020 doirasidagi o‘yinda yurak xurujiga uchragan daniyalik futbolchi “Brentford” bilan shartnoma imzoladi. Kelishuv mavsum oxirigacha mo‘ljallangan bo‘lib, uni yana bir yilga uzaytirish imkoniyati mavjud.Eriksen Daniya terma jamoasining qit’a chempionatidagi ilk — Finlyandiyaga qarshi o‘yinida (0:1) hech qanday kontakt yo‘q joyda yiqildi. Shifokorlar futbolchiga dastlab maydonda yordam ko‘rsatdi, so‘ngra u shifoxonaga yetkazildi. Keyinchalik ma’lum bo‘lishicha, Kristian klinik o‘lim holatini boshdan kechirgan.
Shundan so‘ng Eriksenga kardioverter-defibrillyator o‘rnatildi, bu “Inter” bilan shartnomaning bekor qilinishiga sabab bo‘ldi. Boisi Italiyada futbolchilarga yurak stimulyatori bilan o‘ynash taqiqlangan, shuning uchun tomonlar hamkorlikni to‘xtatishga majbur bo‘ldi. Shu tariqa, 2021-yilning dekabrida Eriksen erkin agentga aylandi va boshqa klublar bilan muzokaralar olib borish imkoniyatiga ega bo‘ldi.
Yevrodagi fojiadan keyin Eriksen nima bilan band edi
Noxush voqeadan bir necha oy o‘tgach, Kristian Daniyaning DR1 telekanaliga bergan intervyusida tafsilotlarni quyidagicha yodga oldi.To‘pga zarba berganimdan keyin, boldir mushagimda qaltirashni his qildim va hushimni yo‘qotdim. Uyg‘onganimda, birinchi navbatda, belimni shikastlab olganman deb o‘yladim. ‘Oyoq barmoqlarimni qimirlata olamanmi’. Bu hayolimga kelgan ilk fikrlar edi. Shunda uzoqdan shifokorlarning ovozini eshitdim. Samolarda bo‘lgan daqiqalarimdan boshqa hamma narsani eslayman. Muxlislar tez yordam mashinasiga olib ketilayotganimda ismimni aytib hayqirishgani ham yodimda. Bir necha daqiqaga o‘lganimni faqat tez yordam mashinasida angladim. Menga hamrohlik qilgan shifokorlarning suhbatidan buni tushundim.Yarim himoyachi tez yordam mashinasida faoliyatini yakunlash haqida o‘ylaganini ham tan oldi: “U yerda o‘zimga shunday dedim: butsilarimni mixga ilaman, boshqa o‘ynamayman. Xuddi shu gaplarni qaylig‘imga aytdim. ‘Har qanday holatda ham boshqa o‘ynamayman’. Yevroda faqat Daniya terma jamoasi ishtirokidagi o‘yinlarni tomosha qildim. Jamoa yarim finalga qadar yetib borganidan xursandman, lekin shu bilan birga uning bir qismi bo‘lishni juda xohlardim. Asosiysi, noxush epizoddan keyin mustaqil yurganim va yugura olganimdir”.Kristian nima uchun faoliyatini davom ettirishga qaror qilgani haqida ham aytib o‘tdi. Futbolchining so‘zlariga ko‘ra, oilasi uning qarorini qo‘llab-quvvatlagan.
Futbolga doim oshiq bo‘lganman. Faoliyatimni davom ettirish istagimni oilam qo‘llab-quvvatladi. Agar qaylig‘im ‘boshqa o‘ynashingni xohlamayman’, deganida, vaziyat boshqacha bo‘lardi. Sabrina sport zaliga yoki mashg‘ulotlarga borishimga qarshi emas. U agar ketsam, keyin, albatta, qaytishimga ishonadi.
Eriksen vataniga qaytib, “Odense” klubida mashg‘ulotlarni boshladi. U yoshligida o‘sha klubda harakat qilgan. Keyinchalik daniyalik Shveysariyaga ko‘chib o‘tdi va uchinchi divizionda ishtirok etadigan mahalliy “Kyasso” klubida mashg‘ulot o‘tkazdi. Sportchi u yerda faoliyatini qayta tiklashni maqsad qilgandi.
Maqsadim — Qatardagi Jahon Chempionatida o‘ynash. Terma jamoada yana o‘ynay olishimni isbotlamoqchiman. Murabbiy saviyamga baho berishi kerak, yuragim bunga xalaqit bermaydi.2020-yilning yanvar oyida Kristian “Ayaks” yoshlar jamoasi mashg‘ulotlarida qatnashdi. Mish-mishlar daniyalikning 2009—2013-yillarda o‘ynagan niderland klubiga qaytgani haqida “gapira” boshladi, biroq futbolchining agenti Eriksen Premyer Ligaga qaytish niyatida ekanligini ta’kidladi.
“Kristian bilan hammasi joyida. Rojdestvo oldidan u tibbiy ko‘rikdan o‘tdi, natijalar judayam quvonarli. Biz uning yanvar oyidan umumiy guruhda mashg‘ulotlarni boshlashini kutyapmiz”, — degandi bir necha hafta oldin futbolchining vakili Martin Shuts.
Nima uchun futbolchi “Brentford”ni tanladi?
Ba’zi ekspertlar Kristianning tanlovidan hayratga tushdi. Chunki uning oldida boshqa takliflar ham talaygina edi. Masalan, “Tottenhem” bosh murabbiyi Antonio Konte futbolchining London klubiga qaytishini istisno etmagandi. Biroq u “Brentford”ga o‘tishni ma’qul ko‘rdi. Ehtimol, yarim himoyachi yangi klubida o‘zini qulay his qilish uchun shunday qarorga kelgandir.“Brentford”da Eriksen ko‘plab tanishlarini uchratadi. Klub bosh murabbiyi Tomas Frank Kristian bilan Daniya yoshlar jamoasida ishlagan. Bundan tashqari jamoada Eriksenning bir qancha hamyurtlari bor: darvozabon Yonas Lyossl, himoyachi Mads Rasmussen, yarim himoyachilar Kristian Nyorgor, Matias Yensen va Mads Bidstrup. Umuman olganda Eriksen uchun yaxshi tanlov. Ammo ko‘pchilik uchun futbolchining jismoniy holati haligacha sir bo‘lib qolmoqda.
“Kristianning o‘yinini qanday tomosha qilishimni tasavvur qilish qiyin”
Futbolchining safga qaytishi futbol jamoatchiligida biroz xavotir uyg‘otmoqda. “Bolton”ning sobiq futbolchisi Fabris Muamba Eriksenning hayotidan juda xavotirdaligini yashirib o‘tirgani yo‘q. 2012- yilda angliyalik futbolchi ham to‘g‘ridan to‘g‘ri maydonning o‘zida yurak xurujiga uchragan (78 daqiqa davomida yuragi urmagan) va faoliyatini yakunlagan. Muamba shifokorlarning talabi bilan shunday qaror chiqargan, o‘sha paytda u endigina 24 yoshda edi.“Ishonchim komilki, Eriksenning Premyer Ligaga qaytishi mumkinligidan nima uchun tashvishlanayotganimni tushunasiz. Yurak xurujidan omon qolgan odam sifatida Kristianning maydondagi harakatlarini qanday kuzatishimni tasavvur qilishim qiyin. Deyli Blindning misolida yurak stimulyatori bilan ham yuqori darajada o‘ynash mumkinligi isbotlangan. Lekin gap jismoniy holat emas, ruhiy jihatga borib taqaladi. Tasavvur qiling-a, futbolchining oilasi bu jarayonda nimalarni his qiladi, bu ular uchun eng qiyini bo‘ladi”, — deya Muambaning so‘zlarini keltirmoqda The Times.
Angliyada ishlash (futbol o‘ynash) uchun ruxsat olishdan oldin Eriksen kardiologlar tomonidan chuqurlashtirilgan ko‘rikdan o‘tdi. Shifokorlar o‘z navbatida Angliya futbol assotsiatsiyasiga hisobot yubordi. Undan bir oy oldin esa Kristian boshqa bir shifokorga turli testlarni topshirgan. Daniyalik sog‘lig‘iga jiddiy yondashmoqda va, aftidan, hozircha tashvishlanishga hech qanday asos yo‘q.
Izoh (0)