2021 йилнинг ёзида ўтказилган Европа чемпионатида бутун футбол оламини қўрқитиб юборган Кристиан Эриксен 14 февраль куни 30 ёшни қаршилади. Қуйида даниялик футболчининг Евро—2020 даги юрак хуружидан кейин нималар қилгани ва қандай қилиб катта спортга қайтгани ҳақида ҳикоя қилинади.
Эриксен етти ой олдин майдонда юраги тўхтаб қолганида фаолиятини якунлаш ҳақида ўйлаётганди. Энди эса АПЛда ўйнайди
Кристиан Эриксен катта футболга қайтди. Ўтган ёзда, Евро—2020 доирасидаги ўйинда юрак хуружига учраган даниялик футболчи «Брентфорд» билан шартнома имзолади. Келишув мавсум охиригача мўлжалланган бўлиб, уни яна бир йилга узайтириш имконияти мавжуд.Эриксен Дания терма жамоасининг қитъа чемпионатидаги илк — Финляндияга қарши ўйинида (0:1) ҳеч қандай контакт йўқ жойда йиқилди. Шифокорлар футболчига дастлаб майдонда ёрдам кўрсатди, сўнгра у шифохонага етказилди. Кейинчалик маълум бўлишича, Кристиан клиник ўлим ҳолатини бошдан кечирган.
Шундан сўнг Эриксенга кардиовертер-дефибриллятор ўрнатилди, бу «Интер» билан шартноманинг бекор қилинишига сабаб бўлди. Боиси Италияда футболчиларга юрак стимулятори билан ўйнаш тақиқланган, шунинг учун томонлар ҳамкорликни тўхтатишга мажбур бўлди. Шу тариқа, 2021 йилнинг декабрида Эриксен эркин агентга айланди ва бошқа клублар билан музокаралар олиб бориш имкониятига эга бўлди.
Евродаги фожиадан кейин Эриксен нима билан банд эди
Нохуш воқеадан бир неча ой ўтгач, Кристиан Даниянинг DR1 телеканалига берган интервьюсида тафсилотларни қуйидагича ёдга олди.Тўпга зарба берганимдан кейин, болдир мушагимда қалтирашни ҳис қилдим ва ҳушимни йўқотдим. Уйғонганимда, биринчи навбатда, белимни шикастлаб олганман деб ўйладим. ‘Оёқ бармоқларимни қимирлата оламанми’. Бу ҳаёлимга келган илк фикрлар эди. Шунда узоқдан шифокорларнинг овозини эшитдим. Самоларда бўлган дақиқаларимдан бошқа ҳамма нарсани эслайман. Мухлислар тез ёрдам машинасига олиб кетилаётганимда исмимни айтиб ҳайқиришгани ҳам ёдимда. Бир неча дақиқага ўлганимни фақат тез ёрдам машинасида англадим. Менга ҳамроҳлик қилган шифокорларнинг суҳбатидан буни тушундим.Ярим ҳимоячи тез ёрдам машинасида фаолиятини якунлаш ҳақида ўйлаганини ҳам тан олди: «У ерда ўзимга шундай дедим: бутсиларимни михга иламан, бошқа ўйнамайман. Худди шу гапларни қайлиғимга айтдим. ‘Ҳар қандай ҳолатда ҳам бошқа ўйнамайман’. Еврода фақат Дания терма жамоаси иштирокидаги ўйинларни томоша қилдим. Жамоа ярим финалга қадар етиб борганидан хурсандман, лекин шу билан бирга унинг бир қисми бўлишни жуда хоҳлардим. Асосийси, нохуш эпизоддан кейин мустақил юрганим ва югура олганимдир».Кристиан нима учун фаолиятини давом эттиришга қарор қилгани ҳақида ҳам айтиб ўтди. Футболчининг сўзларига кўра, оиласи унинг қарорини қўллаб-қувватлаган.
Футболга доим ошиқ бўлганман. Фаолиятимни давом эттириш истагимни оилам қўллаб-қувватлади. Агар қайлиғим ‘бошқа ўйнашингни хоҳламайман’, деганида, вазият бошқача бўларди. Сабрина спорт залига ёки машғулотларга боришимга қарши эмас. У агар кетсам, кейин, албатта, қайтишимга ишонади.
Эриксен ватанига қайтиб, «Оденсе» клубида машғулотларни бошлади. У ёшлигида ўша клубда ҳаракат қилган. Кейинчалик даниялик Швейцарияга кўчиб ўтди ва учинчи дивизионда иштирок этадиган маҳаллий «Кяссо» клубида машғулот ўтказди. Спортчи у ерда фаолиятини қайта тиклашни мақсад қилганди.
Мақсадим — Қатардаги Жаҳон Чемпионатида ўйнаш. Терма жамоада яна ўйнай олишимни исботламоқчиман. Мураббий савиямга баҳо бериши керак, юрагим бунга халақит бермайди.2020 йилнинг январь ойида Кристиан «Аякс» ёшлар жамоаси машғулотларида қатнашди. Миш-мишлар данияликнинг 2009—2013 йилларда ўйнаган нидерланд клубига қайтгани ҳақида «гапира» бошлади, бироқ футболчининг агенти Эриксен Премьер Лигага қайтиш ниятида эканлигини таъкидлади.
«Кристиан билан ҳаммаси жойида. Рождество олдидан у тиббий кўрикдан ўтди, натижалар жудаям қувонарли. Биз унинг январь ойидан умумий гуруҳда машғулотларни бошлашини кутяпмиз», — деганди бир неча ҳафта олдин футболчининг вакили Мартин Шутс.
Нима учун футболчи «Брентфорд»ни танлади?
Баъзи экспертлар Кристианнинг танловидан ҳайратга тушди. Чунки унинг олдида бошқа таклифлар ҳам талайгина эди. Масалан, «Тоттенҳэм» бош мураббийи Антонио Конте футболчининг Лондон клубига қайтишини истисно этмаганди. Бироқ у «Брентфорд»га ўтишни маъқул кўрди. Эҳтимол, ярим ҳимоячи янги клубида ўзини қулай ҳис қилиш учун шундай қарорга келгандир.«Брентфорд»да Эриксен кўплаб танишларини учратади. Клуб бош мураббийи Томас Франк Кристиан билан Дания ёшлар жамоасида ишлаган. Бундан ташқари жамоада Эриксеннинг бир қанча ҳамюртлари бор: дарвозабон Йонас Льоссл, ҳимоячи Мадс Расмуссен, ярим ҳимоячилар Кристиан Ньоргор, Матиас Йенсен ва Мадс Бидструп. Умуман олганда Эриксен учун яхши танлов. Аммо кўпчилик учун футболчининг жисмоний ҳолати ҳалигача сир бўлиб қолмоқда.
«Кристианнинг ўйинини қандай томоша қилишимни тасаввур қилиш қийин»
Футболчининг сафга қайтиши футбол жамоатчилигида бироз хавотир уйғотмоқда. «Болтон»нинг собиқ футболчиси Фабрис Муамба Эриксеннинг ҳаётидан жуда хавотирдалигини яшириб ўтиргани йўқ. 2012- йилда англиялик футболчи ҳам тўғридан-тўғри майдоннинг ўзида юрак хуружига учраган (78 дақиқа давомида юраги урмаган) ва фаолиятини якунлаган. Муамба шифокорларнинг талаби билан шундай қарор чиқарган, ўша пайтда у эндигина 24 ёшда эди.«Ишончим комилки, Эриксеннинг Премьер Лигага қайтиши мумкинлигидан нима учун ташвишланаётганимни тушунасиз. Юрак хуружидан омон қолган одам сифатида Кристианнинг майдондаги ҳаракатларини қандай кузатишимни тасаввур қилишим қийин. Дейли Блинднинг мисолида юрак стимулятори билан ҳам юқори даражада ўйнаш мумкинлиги исботланган. Лекин гап жисмоний ҳолат эмас, руҳий жиҳатга бориб тақалади. Тасаввур қилинг-а, футболчининг оиласи бу жараёнда нималарни ҳис қилади, бу улар учун энг қийини бўлади», — дея Муамбанинг сўзларини келтирмоқда The Times.
Англияда ишлаш (футбол ўйнаш) учун рухсат олишдан олдин Эриксен кардиологлар томонидан чуқурлаштирилган кўрикдан ўтди. Шифокорлар ўз навбатида Англия футбол ассоциациясига ҳисобот юборди. Ундан бир ой олдин эса Кристиан бошқа бир шифокорга турли тестларни топширган. Даниялик соғлиғига жиддий ёндашмоқда ва, афтидан, ҳозирча ташвишланишга ҳеч қандай асос йўқ.
Изоҳ (0)