Niderlandiya, Chernogoriya, Yaponiya va Janubiy Koreya o‘z fuqarolariga Ukrainaga bormaslikni tavsiya qildi va u yerda bo‘lganlardan mamlakatdan chiqib ketishni so‘radi. Bu haqda “RBK” xabar berdi.
Chernogoriya TIV keskinlikning ortishi va xavfsizlik borasida vaziyat tufayli fuqarolardan vaqtinchalik Ukrainadan chiqib ketishni so‘radi. Janubiy Koreya Ukrainaga qizil xavf darajasini qo‘ydi va ushbu mamlakatga safarlarni taqiqladi.
Kiyevdagi Niderlandiya elchisi Yennes de Mol fuqarolarga zudlik bilan Ukraina hududidan ketishni tavsiya qildi. Shuningdek, TIV rasmiy saytida odamlarga Rossiya yoki Belarus bilan chegara hududidan qochish, Ukrainada bo‘lganlarga esa mamlakat hududini tezroq tark etish maslahat berilgan.
Yaponiya TIV ham Ukraina hududida bo‘lgan yaponiyaliklarga zudlik bilan mamlakatdan chiqib ketishni tavsiya qilgan.
10-fevralda AQSh davlat departamenti fuqarolarga Ukrainaga bormaslik yoki zudlik bilan Rossiya harbiy harakatlari xavfi bo‘lgan va COVID-19 bilan kasallanishlar ko‘paygan hududdan ketishni tavsiya etgan. AQSh prezidenti Jo Bayden Ukrainadagi barcha amerikaliklardan hoziroq mamlakatdan ketishni so‘ragan.
Shuningdek, Latviya TIV ham o‘z fuqarolariga Ukrainadan chiqib ketishni maslahat bergan.
Rossiya harbiylarining Ukraina chegaralariga joylashishi tufayli AQSh, Avstraliya, Buyuk Britaniya, Germaniya, Kanada, Yaponiya, Isroil Ukrainadagi diplomatlarining bir qismi hamda ularning oilalarini boshqa yerga evakuatsiya qilgan.
Izoh (0)