Fransiya prezidenti Emmanuel Makron 2050-yilgacha kamida oltita yangi atom elektr stansiyasi (AES) qurish rejasini e’lon qildi, deb xabar beradi Deutsche Welle.
Davlat rahbari Belfor shahridagi turbina zavodiga tashrifi chog‘ida Fransiyaning energetika kelajagi bo‘yicha o‘z qarashlarini bildirib, Electricite de France (EDF) tomonidan kamida oltita yangi yadro reaktorlarini qurish bo‘yicha asosiy rejani ma’lum qilgan.
Nashr ma’lumotlariga ko‘ra, uchinchi avlod bosimli suv reaktorlari (EPR) qurilishi 2050-yilgacha yakunlanishi kerak. Siyosatchining aytishicha, u yana sakkizta reaktor qurish imkoniyatini ko‘rib chiqmoqda. Butun loyiha Fransiyada issiqxona gazlarini chiqarishning qisqartirilishi shiori ostida amalga oshiriladi.
Makron atom energetikasini rivojlantirish rejalaridan tashqari, Fransiyada eski yadro reaktorlarini o‘chirilishiga qarshi ekanini aytib, xavfsizligi ta’minlanishi sharti bilan ularning xizmat ko‘rsatish muddatini “50 yildan ortiqqa” uzaytirishga erishishga va’da bergan.
Biroq Fransiya yetakchisi asosiy e’tiborni mamlakat energetikasining 70 foizini ta’minlaydigan yadro energetikasiga qaratgan. Yangi yadroviy reaktorlarni qurish katta xarajat talab etishi va murakkabligi haqidagi xavotirlarga qaramay, Makron atom energiyasini ekologik toza va iqtisodiy jihatdan foydali variant sifatida qo‘llab-quvvatlashini aytgan.
Makron yangi qurilishni e’lon qilish bilan birga, EDF eski atom stansiyalarining xizmat qilish muddatini 40 dan 50 yilga uzaytirishini xohlashini ma’lum qilgan. Uning so‘zlariga ko‘ra, atom reaktorlarining qurilishi qayta tiklanadigan energetikani rivojlantirish bilan birgalikda Fransiyaga 2050-yilgacha uglerod neytralligiga erishish imkonini berishi kerak.
Avvalroq Xitoyning “Tayshan” AESda radiatsiya darajasi oshgani, Lukashenko Belarusda ikkinchi AES qurishga ruxsat bergani, Fransiya, Polsha va yana besh mamlakat atom energetikasini yoqlab chiqqani to‘g‘risida xabar berilgandi.
Izoh (0)