Toshkent viloyati Chinoz tumani hokimi o‘rinbosari yer olib berish uchun pora olgan vaqtda ushlandi. Bu haqda Bosh prokuratura matbuot kotibi Hayot Shamsutdinov “Daryo”ga ma’lum qildi.
Ma’lum qilinishicha, Chinoz tumani hokimining iqtisodiy masalalar bo‘yicha birinchi o‘rinbosari Oqqo‘rg‘on tumanida joylashgan fermer xo‘jaligiga tegishli bo‘lgan sug‘oriladigan 35 gektar yer maydonini sotish va hujjatlarni tuman hokimligida ishlovchi tanishlari orqali rasmiylashtirib berish uchun 90 ming dollar so‘ragan. Hokim o‘rinbosari kelishilgan pulning 40 ming dollarini olgan vaqtida ushlangan.
Mazkur holat yuzasidan Jinoyat kodeksining 229-6-moddasi (sug‘oriladigan yer uchastkasiga yoki uning bir qismiga bo‘lgan huquqni sotish yoxud qonunga xilof ravishda boshqacha tarzda o‘zga shaxsga berish) bilan jinoyat ishi qo‘zg‘atildi.
Gumonlanuvchi protsessual tartibida ushlangan.
Avvalroq Qashqadaryo viloyati Mirishkor tumani hokimi o‘rinbosari — mahalla va oilani qo‘llab-quvvatlash bo‘limi boshlig‘i chorvachilik bilan shug‘ullanmoqchi bo‘lgan fuqaroning ishonchiga kirib, unga Mirishkor va Muborak tumanlari hududidan jami 1000 gektar yer maydoni ajratib berish evaziga 50 ming dollar olgan vaqtida ushlangan edi.
Izoh (0)