Qashqadaryo viloyati Qarshi davlat universitetida 38 tup daraxt noqonuniy kesib tashlangani xabar qilingandi. Bosh prokuratura matbuot kotibi holat yuzasidan qo‘shimcha ma’lumot berdi.
Qayd etilishicha, Qarshi davlat universitetining 6 nafar mas’ul xodimiga nisbatan Ma’muriy javobgarlik to‘g‘risidagi kodeksning 79-moddasi (daraxtlarni, butalarni, boshqa o‘simliklarni va nihollarni qonunga xilof ravishda kesish, kundakov qilish, shikastlantirish, yo‘q qilish yoki boshqa joyga ko‘chirib o‘tkazish) 1-qismi bilan ma’muriy javobgarlikka oid ish qo‘zg‘atilgan.
Ushbu holatda tabiatga 285 million so‘m miqdorida zarar yetkazilgani aniqlangan.
Eslatib o‘tamiz, o‘rganishlar davomida Qarshi davlat universiteti tomonidan Yagona davlat interaktiv xizmatlari portali orqali davlat o‘rmon fondiga kirmaydigan daraxtlarni kesish uchun uch marotaba murojaat qilingan. O‘z navbatida Qashqadaryo viloyati Ekologiya va atrof-muhitni muhofaza qilish boshqarmasi tomonidan mazkur murojaatlarga rad javobi berilgan.
Ekologiya va atrof-muhitni muhofaza qilish boshqarmasi tomonidan rad javobi berilganiga qaramasdan, universitet hududidagi jami 38 tup daraxt noqonuniy kesilgani aniqlangan. Huquqbuzarlikka aloqador shaxslardan tushuntirish xatlari olingan.
Mavzuga doir:
- Asakada 10 ga yaqin daraxt kesib tashlangan. Holat yuzasidan ochilgan ish sudga oshirildi
- Payariqdagi maktab daraxtlarini kesgan mas’ullar jarimaga tortildi. Direktor o‘rinbosari ishdan olingan
- Yunusobodda tadbirkor daraxtlar ostini betonlab tashladi. Avvalroq bu yerda 10 tup daraxt arralab ketilgandi
Izoh (0)