Namanganda bir Nexia ag‘anadi, boshqasi esa piyodaning o‘limiga sabab bo‘ldi. Yo‘llardagi baxtsiz hodisalar tafsilotlari

O‘zbekiston yo‘llarida sodir bo‘lgan yo‘l-transport hodisalari tafsilotlarini taqdim etamiz.

Namanganda Nexia ag‘darildi

2022-yil 4-fevral kuni soat 05:00 larda To‘raqo‘rg‘on tumani, “Shoxidon” MFY hududida Nexia-3 avtomashinasini boshqarib ketayotgan haydovchi harakat xavfsizligini ta’minlay olmay, yo‘lning o‘ng chetiga chiqib ketib, boshqaruvni yo‘qotib, ag‘darilib ketgan.

Oqibatda avtomashina salonida bo‘lgan haydovchining o‘g‘li (1995-yilda tug‘ilgan) olgan tan jarohati tufayli shifoxonada vafot etgan. Haydovchi esa bosh miya ochiq shikasti, bosh miya to‘qimalari ezilishi, miyaga qon quyilishi, chap yelka suyagining yopiq sinishi tashxisi bilan shifoxonaga yotqizilgan.

Ushbu holat bo‘yicha To‘raqo‘rg‘on tumani IIB huzuridagi TB tomonidan 2022-yil 4-fevral kuni Jinoyat kodeksining 266-moddasi 2-qismi (odam o‘limiga sabab bo‘lgan transport boshqarish xavfsizligini buzish) bilan jinoyat ishi qo‘zg‘atilgan.

Chustda Nexia urib ketishi oqibatida piyoda vafot etdi

2022-yil 5-fevral kuni soat 15:20 larda 4K-462A Chust—G‘ova yo‘lining 3-kilometrida “Bibiona” MFY hududida, Chust tumanida yashovchi fuqaro (1996-yilda tug‘ilgan) Nexia avtomashinasini boshqarib borayotib, harakat xavfsizligini ta‘minlay olmay, yo‘lni kesib o‘tayotgan piyoda — Chust tumanida yashagan ayolni (1954-yilda tug‘ilgan) urib yuborgan.

Oqibatda piyoda olgan og‘ir tan jarohati oqibatida shifoxonada vafot etgan.

Ushbu holat bo‘yicha Chust tuman IIB huzuridagi TB tomonidan 2022-yil 5-fevral kuni Jinoyat kodeksining 266-moddasi 2-qismi bilan jinoyat ishi qo‘zg‘atilgan.