Qashqadaryo viloyati Mirishkor tumani hokimi o‘rinbosari fuqaroga yer olib berish uchun pora olgan vaqtda ushlandi. Bu haqda Davlat xavfsizlik xizmati xabar qildi.
Qayd etilishicha, tuman hokimining o‘rinbosari — mahalla va oilani qo‘llab-quvvatlash bo‘limi boshlig‘i chorvachilik bilan shug‘ullanmoqchi bo‘lgan fuqaroning ishonchiga kirib, unga Mirishkor va Muborak tumanlari hududidan jami 1000 gektar yer maydoni ajratib berishni va’da qilgan. Buning evaziga 80 ming dollar talab qilgan.
U so‘ralgan puldan 50 ming dollarini olgan vaqtida DXXning Qashqadaryo viloyati bo‘yicha boshqarmasi, viloyat prokuraturasi hamda Iqtisodiy jinoyatlarga qarshi kurashish departamentining hududiy boshqarmasi xodimlari tomonidan ushlangan.
Hozirda holat yuzasidan Jinoyat kodeksining 168 (firibgarlik) va 211-moddalari (pora berish) bilan jinoyat ishlari qo‘zg‘atilgan. Dastlabki tergov harakatlari olib borilmoqda.
Izoh (0)