Тошкент вилояти Чиноз тумани ҳокими ўринбосари ер олиб бериш учун пора олган вақтда ушланди. Бу ҳақда Бош прокуратура матбуот котиби Ҳаёт Шамсутдинов «Дарё»га маълум қилди.
Маълум қилинишича, Чиноз тумани ҳокимининг иқтисодий масалалар бўйича биринчи ўринбосари Оққўрғон туманида жойлашган фермер хўжалигига тегишли бўлган суғориладиган 35 гектар ер майдонини сотиш ва ҳужжатларни туман ҳокимлигида ишловчи танишлари орқали расмийлаштириб бериш учун 90 минг доллар сўраган. Ҳоким ўринбосари келишилган пулнинг 40 минг долларини олган вақтида ушланган.
Мазкур ҳолат юзасидан Жиноят кодексининг 229-6-моддаси (суғориладиган ер участкасига ёки унинг бир қисмига бўлган ҳуқуқни сотиш ёхуд қонунга хилоф равишда бошқача тарзда ўзга шахсга бериш) билан жиноят иши қўзғатилди.
Гумонланувчи процессуал тартибида ушланган.
Аввалроқ Қашқадарё вилояти Миришкор тумани ҳокими ўринбосари — маҳалла ва оилани қўллаб-қувватлаш бўлими бошлиғи чорвачилик билан шуғулланмоқчи бўлган фуқаронинг ишончига кириб, унга Миришкор ва Муборак туманлари ҳудудидан жами 1000 гектар ер майдони ажратиб бериш эвазига 50 минг доллар олган вақтида ушланган эди.
Изоҳ (0)