Johnson & Johnson kompaniyasi koronavirusga qarshi yaroqli vaksinalar partiyasini ishlab chiqayotgan yagona zavodini yopdi, deb xabar beradi Reuters.
The New York Times gazetasining ma’lum qilishicha, korporatsiya Niderlandiyaning Leyden shahridagi zavodini 2021-yil oxirida yopgan. Buning o‘rniga zavod boshqa virusdan himoya qiluvchi eksperimental, ammo potentsial foydali vaksinani ishlab chiqarmoqda.
Kompaniyadagilarning ta’kidlashicha, Johnson & Johnson’ning omborlarida hozirda millionlab doza vaksina bor va u o‘z zavodlarini vaksinani ishlab chiqarishda kerak bo‘ladigan dorivor vositalar bilan ta’minlashni davom etyapti.
“Biz COVAX Facility va Afrika ittifoqi bo‘yicha shartnoma majburiyatlarimizni bajarishni davom etyapmiz”, — deyiladi kompaniya bayonotida.
Aniqlik kiritilishicha, zavodning to‘xtatilishi vaqtincha — bir necha oyga bo‘lib, keyinroq kompaniya ishlab chiqarishni qayta tiklaydi. Ammo agentlik ma’lumotlariga ko‘ra, zavodning vaqtincha to‘xtab qolishi J&J vaksinalarini yetkazib berishni bir necha yuz million dozaga qisqartirishi mumkin.
Eslatib o‘tamiz, 2021-yilning fevralida AQSh Oziq-ovqat va farmatsevtika boshqarmasi (FDA) Johnson & Johnson kompaniyasi tomonidan ishlab chiqilgan koronavirusga qarshi vaksinaning mamlakatda qo‘llanilishiga ruxsat bergandi. O‘shanda vaksinadan favqulodda vaziyatlarda foydalanish uchun ruxsat berilgan va u bilan 18 yoshdan oshgan fuqarolar emlanishi belgilangan edi. Johnson & Johnson vaksinasi bir marotaba qilinadi. Aprel oyida esa AQShda Johnson & Johnson bilan emlanganlarda nojo‘ya ta’sirlar paydo bo‘lgach, ikkita vaksinatsiya markazi yopilgan edi.
Avvalroq Buyuk Britaniyada koronavirusga qarshi Novavax vaksinasidan foydalanishga ruxsat berilgani, Pfizer omikronga qarshi vaksinaning klinik sinovlarini boshlagani to‘g‘risida xabar berilgandi.
Izoh (0)