“Tolibon” harakati vakillari delegatsiyasi gumanitar masalalarni muhokama qilish uchun Shveysariyaga keldi. Bu haqda ushbu delegatsiyani mamlakatga taklif qilgan Geneva Call nodavlat tashkiloti ijrochi direktori Alen Deletro RTS telekanaliga bergan intervyusida ma’lum qildi.
“Jenevaga kelgan vakillar Kobul rasmiylari tomonidan yuborilgan va umid qilamizki, ular qaytib ketgach, Afg‘onistonda insonparvarlik qonunchiligi hurmat qilinishini ta’minlash uchun qo‘ldan kelgan barcha ishni qiladi”, — deydi Deletro.
Ijrochi direktorning qayd etishicha, “Tolibon” delegatsiyasi bilan uchrashuv ularning rasman tan olinishini bildirmaydi. “Gumanitar tashkilot bilan muloqot ularni qonuniylashtirmaydi va ularning xalqaro maqomida hech narsa o‘zgarmaydi. Ularni faqat xalqaro konvensiyalar va xalqaro gumanitar huquqni hurmat qilish orqali qonuniylashtirish mumkin”, — deya ta’kidlaydi u.
RTS ma’lumotlariga ko‘ra, Afg‘oniston delegatsiyasi Shveysariyaga 6-yanvar kuni yetib kelgan. Mamlakat Tashqi ishlar vazirligi gap Shveysariyaga rasmiy tashrif haqida emas, balki “fuqarolik jamiyati tomonidan tashkil etilgan muhokamalar” haqida ketayotganini bildirgan. Shunga qaramay, Shveysariya tashqi siyosiy idorasi vakillari toliblar delegatsiyasi bilan uchrashuv o‘tkazishni rejalashtirgan. Shveysariya tomonidan Tashqi ishlar vazirligining Taraqqiyot va hamkorlik direksiyasi, shuningdek, Osiyo-Tinch okeani mintaqasi va inson huquqlari bilan shug‘ullanuvchi tarkibiy bo‘linmalari xodimlarining ishtiroki etishi kutilmoqda. Diplomatik idoraning ma’lum qilishicha, muloqot “yopiq eshiklar ortida” bo‘lib o‘tadi.
O‘z navbatida Qizil Xoch xalqaro qo‘mitasi Jenevada toliblar bilan “dialogni davom ettirish” niyatida ekanini va “konstruktiv muloqotga” umid qilishini bildirgan.
Avvalroq Afg‘onistondagi vaziyat BMT hisobotida aytilganidan yomonroqligi ma’lum qilingandi. Afg‘onistonda “Tolibon” hokimiyatga kelgach, AQSh hukumati afg‘on aktivlarini, Jahon banki va Xalqaro valyuta jamg‘armasi esa Afg‘oniston iqtisodiyoti va boshqaruvini qo‘llab-quvvatlashga mo‘ljallangan mablag‘larni “Tolibon” qo‘liga tushib qolishidan va noto‘g‘ri maqsadda ishlatilishidan qo‘rqib, muzlatib qo‘ygandi. Rossiya, Xitoy, Pokiston va bir qator MDH davlatlari AQSh sanksiyalari og‘ir ahvolda qolgan afg‘on xalqiga gumanitar yordam yetkazilishga to‘sqinlik qilayotganini da’vo qilib, bu pullarni blokdan chiqarishga chaqirmoqda.
Eslatib o‘tamiz, BMTning gumanitar masalalarni muvofiqlashtirish boshqarmasi 2022-yil yanvariga qadar Afg‘onistonda davom etayotgan gumanitar inqirozni hal etish uchun 1,5 milliard dollarga yaqin mablag‘ to‘plagan. Ushbu mablag‘lar qisman afg‘onlarni qishga tayyorlash, jumladan, naqd pul va nooziq-ovqat mahsulotlarini to‘g‘ridan to‘g‘ri taqsimlashni qo‘llab-quvvatlash uchun sarflangan.
Izoh (0)