Ukraina prezidenti Vladimir Zelenskiy Belarus prezidenti Aleksandr Lukashenkoning Rossiya bilan urush boshlangan taqdirda Ukrainaga neft mahsulotlari va elektr energiyasi yetkazib berishni to‘xtatib qo‘yishi borasidagi tahdidiga munosabat bildirdi, deb xabar beradi “Liga.net” portali.
Zelenskiyning so‘zlariga ko‘ra, mamlakatlar o‘rtasidagi savdolarning bekor qilinishidan aynan Belarus zarar ko‘radi.
“Yaqinda, o‘rtoqlar, Belarusda bir inson Rossiya tomonidan harbiy harakatlar amalga oshirilsa, Ukrainaga energiya resurslarini yetkazib berishni to‘xtatib qo‘yishlarini ma’lum qildi. U inson shu so‘zlarni aytdi va biz bunga qanday munosabat bildirishimiz kerak?
Men sizlarga qanday munosabatda bo‘lganimni aytib beraman. Menga Ukraina va Belarus o‘rtasidagi tovar aylanmasi statistikasini berishlarini so‘radim. Bizdagi tovar aylanmasi 6 milliard dollarga teng. Shundan 1,5 milliard Ukraina tomonidan Belarusga, 4,5 milliard esa Belarus tomonidan Ukrainaga qilinadigan eksportlardir.
Ya’ni mamlakatlar bir-biri bilan savdoni cheklasa, kim bundan zarar ko‘radi? Ayni vaziyatda oddiy odamlar. Agar tosh asriga qaytish istagi bo‘lsa, shunday qilsa bo‘ladi. Belarus nimanidir, Ukraina ham nimanidir taqiqlaydi. Har doim siyosatchilar hal qiladi, jabrini esa afsuski, oddiy odamlar ko‘radi”, — deydi Zelenskiy.
6-fevral kuni Lukashenko Moskva va Kiyev o‘rtasida ziddiyat kuchaygan taqdirda Belarus Ukrainaga yoqilg‘i-moylash materiallari va elektr energiyasini yetkazib bermasligini ma’lum qilgandi.
Ta’kidlash kerakki, Ukraina benzin bozorining qariyb yarmini import yonilg‘isi tashkil etadi, bunda Belarusdan amalga oshiriladigan import hajmi 80 foizga yaqin.
Avvalroq prezident Aleksandr Lukashenko teleboshlovchi Vladimir Solovyovga bergan intervyusida Ukraina Donbassga qarshi urush boshlasa, Belarus armiyasi xuddi Rossiya armiyasi kabi harakat qilishini aytgandi.
Izoh (0)