So‘nggi bir necha kun ichida Suriyaning AQSh nazorati ostida bo‘lgan hududlarida 10 ta terakt va qo‘poruvchilik harakatlari sodir etilishi oqibatida qariyb 20 kishi halok bo‘ldi, o‘nlab fuqarolar yaralandi. Bu haqda Rossiyaning mamlakatdagi Nizolashayotgan tomonlarni yarashtirish markazi rahbari o‘rinbosari Oleg Juravlyovga tayanib, “Interfaks” xabar berdi.
“So‘nggi uch sutkaning o‘zida mintaqada 10 ta terakt va qo‘poruvchilik harakatlari sodir etildi. Oqibatda 18 kishi halok bo‘ldi va 25 kishi yaralandi”, — deydi Juravlyov.
Uning ta’kidlashicha, Qo‘shma Shtatlar va Buyuk Britaniya terrorchilik guruhlari a’zolari uchun “amnistiya” nomli dasturni amalga oshirishni davom ettirmoqda. “Radikal oqimlarning yuzlab a’zolari qamoqdan ozod etildi va AQSh nazorati ostidagi qurolli tuzilmalar safiga qabul qilindi. Mavjud ma’lumotlarga ko‘ra, ularning bir qismi Et-Tanf zonasi hududiga tashlangan”, — deya ta’kidlaydi u.
Juravlyovning qayd etishicha, bu kabi harakatlar terrorchilik xavfining kuchayishiga sabab bo‘lmoqda.
“Mavjud ma’lumotlarga qaraganda, yashirin to‘dalarning yetakchilari davlat xizmatchilariga qarshi va Xoms, Damashq, Dera va As-Suvayda viloyatlaridagi obyektlarda qo‘poruvchilik harakatlarini amalga oshirishni rejalashtirmoqda”, — deydi u.
Suriyadagi nizolashayotgan tomonlarni yarashtirish markazi rahbari o‘rinbosarining ma’lum qilishicha, o‘tgan bir sutka ichida Idlibdagi deeskalatsiya zonasida “Jabhat an-Nusra” terrorchilik guruhi pozitsiyasi tomonidan ikki marta o‘t ochilgani qayd etilgan. Terrorchilarning snayper hujumlari oqibatida El-Fatatuat va Kuljok tumanlaridagi ikki nafar suriyalik harbiy xizmatchi yaralangan.
Avvalroq Bayden Suriyadagi maxsus amaliyotda IShID yetakchisi o‘ldirilganini e’lon qilgani, IShID jangarilari Suriyadagi qamoqxonaga hujum qilib, mahbuslarni ozod etishga uringani to‘g‘risida xabar berilgandi.
Izoh (0)