Kolumbiya g‘arbidagi Doskebradas shahrida ko‘chki oqibatida 15 kishi, jumladan, ikki nafar voyaga yetmaganlar halok bo‘ldi, yana 34 kishi jarohat oldi. Bu haqda El Tiempo nashri xabar berdi.
Rasmiylarning ma’lumotlariga ko‘ra, bir kishi bedarak yo‘qolgan. Halok bo‘lganlar sonini tasdiqlagan qo‘shni Pereyra shahri meri Karlos Maya hududda ko‘chki xavfi saqlanib qolayotganidan ogohlantirdi va yana qurbonlar bo‘lmasligi uchun odamlarni shaharni tark etishga chaqirdi.
Doskebradas shahriga ko‘chki 8-fevral kuni ertalab kuchli yomg‘irdan so‘ng yopirilgan, bu daryo toshqiniga ham sabab bo‘lgan. 20 ga yaqin uy tuproq ostida qolgan.
“Xavfsizlik nuqtayi nazaridan yaqin atrofda joylashgan 15 ta uy aholisini evakuatsiya qilishga qaror qildik”, — dedi Karlos Maya.
Jarohatlanganlar shifoxonaga yetkazilgan. Kolumbiya prezidenti Ivan Duke halok bo‘lganlarning oila a’zolariga hamdardlik bildirdi.
Mahalliy aholining ta’kidlashicha, ilgari xuddi shunday fojia 1973-yilda yuz bergan. O‘shanda ko‘chki 60 kishining hayotiga zomin bo‘lgan.
Avvalroq Avstriyada qor ko‘chishi oqibatida besh kishi halok bo‘lgandi. Ma’lumotlarga ko‘ra, shvetsiyalik chang‘ichilar guruhi va mahalliy instruktor ko‘chki ostida qolib ketgan.
Shuningdek, Braziliyada kuchli yog‘ingarchilik 20 kishining o‘limiga sababchi bo‘lgani, AQShda qor dovuli sabab 5 mingga yaqin aviareys bekor qilingani, JARda tropik bo‘ron oqibatida 70 kishi halok bo‘lgani to‘g‘risida xabarlar berilgandi.
Izoh (0)