Fransiya, Germaniya va Polsha — Veymar uchburchagi davlatlari Rossiyani Yevropa qit’asidagi xavfsizlik masalalari bo‘yicha muloqotni boshlashga chaqiruvchi bayonot bilan chiqdi. Bu haqda “Interfaks” xabar berdi.
Fransiya prezidenti Emmanuel Makron, Germaniya kansleri Olaf Shols va Polsha prezidenti Anjey Duda Berlindagi muzokaralar yakunlari bo‘yicha qo‘shma hujjatda Rossiyani Ukraina chegarasidagi vaziyatni yumshatishga hissa qo‘shishga va Yevropa qit’asidagi xavfsizlik bo‘yicha mazmunli muloqotni boshlashga chaqirgan.
Ular “o‘zaro manfaatli va natijaga yo‘naltirilgan xavfsizlik masalalari bo‘yicha muzokaralarda konstruktiv ishtirok etishga” tayyorligini ta’kidlagan.
Hujjatda shunday deyiladi: “Veymar uchburchagi davlat va hukumat rahbarlari Yevropa va transatlantik xavfsizlik arxitekturasini mustahkamlash bo‘yicha birgalikdagi sa’y-harakatlarga sodiqligini alohida bildirdi”.
Tomonlar Ukraina suvereniteti va hududiy yaxlitligini qo‘llab-quvvatlashini hamda vaziyat keskinlashgan taqdirda Rossiya uchun buning “oqibatlari”ni yana bir bor eslatdi, shuningdek, Minsk kelishuvlarini amalga oshirishda Normand formatining rolini qayta e’tirof etdi. Uchala yetakchi ham NATO voqealarning o‘zgaruvchanligini hisobga olgan holda hamda blokni “old qanotda kengaytirish” dasturi doirasida “mudofaa va oldini olish strategiyasini doimiy ravishda ko‘rib chiqishi” zarurligini ta’kidladi.
AQSh prezidenti Jo Bayden va Germaniya kansleri Olaf Shols 7-yanvar kuni Vashingtonda Ukraina atrofidagi vaziyat, Rossiyani jilovlash va energetika bilan bog‘liq masalalarni muhokama qilgandi. O‘sha kuni Kremlda Rossiya va Fransiya prezidentlari Vladimir Putin hamda Emmanuel Makron o‘rtasida besh soatlik muzokaralar bo‘lib o‘tgan. Muzokaralardan keyingi bayonotida Makron “hozircha kelishib oldik, deb bo‘lmaydi, lekin jarayon boshlandi”, deya ta’kidlagan.
Izoh (0)