SpaceX bosh direktori Ilon Mask Lex Fridmanning YouTube’da e’lon qilingan podkastida hozirgi sharoitda odamlarni Marsga yuborish trillion dollarga tushishini aytdi.
“Biz Marsni mustamlaka qila olmaymiz, chunki bu hozircha juda qimmat. Ayni damda odamlarni Marsga jo‘natish bir trillion dollarga tushadi. Gap shundaki, buning uchun birgina raketalar kamlik qiladi, odamlarga tibbiy asbob-uskunalar, aloqa vositalari kerak”, — deydi tadbirkor.
Shuningdek, u quyosh energiyasi bilan ishlaydigan yerosti gidroponik fermalaridan foydalangan holda o‘zini o‘zi ta’minlaydigan koloniya shaharlar qurmoqchiligini aytdi. Bu esa ekinlar yetishtirish, odamlarga oziq-ovqat yetishtirish uchun sharoit yaratadi.
Mask odamlarni Marsga besh-o‘n yil ichida olib chiqishni rejalashtirayotganini, hozir uning muhandislari Qizil sayyoraga kolonistlar va yuklarni tashish xarajatlarini kamaytirish yo‘llarini izlayotganini ta’kidladi.
Avvalroq Mask Marsni o‘zlashtirish jarayonida ancha-muncha odam qurbon bo‘lishini aytgandi. Unga ko‘ra, Marsni o‘rganish badalini sayyoraga borgan birinchi ko‘ngillilar hayoti bilan to‘lashga to‘g‘ri kelishi mumkin.
2020-yilda Mask o‘z kompaniyasining olti yildan keyin birinchilardan bo‘lib Marsga odam yetkazishi mumkinligini aytgan edi. “Agar omadimiz kelsa, to‘rt yilda ham bo‘lishi mumkin”, — deb taxmin qilgan u.
Izoh (0)