Pokistonda terrorchilar harbiylar lageriga hujum qildi. 20 kishi halok bo‘lgani aytilmoqda

Pokiston janubi-g‘arbidagi Balujiston viloyatida mamlakat chegara korpusining harbiylashtirilgan tuzilmasiga qarashli ikkita lageriga qilingan hujumlar oqibatida 13 nafar terrorchi yo‘q qilindi va yetti nafar harbiy xizmatchi halok bo‘ldi. Bu haqda mamlakat Mudofaa vazirligiga tayanib, Sinxua agentligi xabar berdi.

Ma’lum qilinishicha, xavfsizlik kuchlari Balujiston viloyatining Panjgur va Nushki okruglariga uyushtirilgan hujumlarning ikkisini ham qaytargan. Hujum oqibatida to‘rt nafar terrorchi yo‘q qilingan va bir nafar harbiy xizmatchi halok bo‘lgan.

Hujum qaytarilgach, xavfsizlik kuchlari tozalash va hududda yashiringan terrorchilarni qo‘lga olish bo‘yicha operatsiya o‘tkazgan.

“Xavfsizlik kuchlari Nushki okrugida yana besh nafar terrorchiga duch keldi va ularni yo‘q qildi”, — deyiladi xabarda. Ma’lumotlarga ko‘ra, to‘rt nafar harbiy xizmatchi, jumladan, bir nafar ofitser ham halok bo‘lgan.

Bundan tashqari, Panjgur okrugida to‘rt nafar terrorchi o‘ldirilgan va yana kamida besh nafari qurshab olingan. Xavfsizlik kuchlarining mazkur okrugdagi operatsiyasi ayni vaqtda davom etmoqda.

“Balujistonni ozod etish fronti” nomli taqiqlangan tashkilot hujum uchun mas’uliyatni o‘z zimmasiga olgan.

Eslatib o‘tamiz, yanvar oxirlarida Pokiston janubi-g‘arbidagi Balujiston provinsiyasida sodir etilgan teraktda 10 nafar harbiy halok bo‘lgandi.