Meta Platforms asoschisi Mark Sukerberg Forbes jurnali talqini bo‘yicha dunyoning eng boy odamlari o‘nligida egallab turgan o‘rnini yo‘qotdi. Forbes ma’lumotlariga ko‘ra, milliarderning boyligi bir kunda 25,93 foizga yoki 29,7 milliard dollarga kamayganidan keyin u 12-o‘ringa tushib ketgan. 4-fevral holatiga Sukerbergning boyligi 84,8 milliard dollarni tashkil qilmoqda.
Forbes ma’lumotlariga ko‘ra, Sukerberg 2015-yilning yozidan beri birinchi marta milliarderlarning Top-10 taligidan joy egallamadi. Meta rahbari bir kunda ko‘rgan yo‘qotishlari miqdori bo‘yicha Ilon Maskdan keyin ikkinchi o‘rinda turibdi. Dunyoning eng boy odami Mask 2022-yilning noyabr oyida Twitter’da foydalanuvchilardan soliq to‘lash uchun Tesla aksiyalarining 10 foizini sotishi kerakmi yoki yo‘qligi haqida so‘rov o‘tkazgach, bir kunda 35 milliard dollar yo‘qotgandi.
Bloomberg Billionaires Index ma’lumotlarida Meta Platforms rahbari hozirda dunyodagi eng boy o‘ninchi odami ekani aytilmoqda. Bloomberg ekspertlari uning bir sutkada yo‘qotgan boyligini 31 milliard dollarga, hozir tasarrufidagi boyligini 89,6 milliard dollarga baholamoqda. Forbes ro‘yxatining o‘ninchi qatoridan esa Adani Group rahbari Gautam Adani, 90,1 milliard dollar bilan joy olib turibdi.
Mark Sukerberg Meta Platforms’ning deyarli 13 foiziga egalik qiladi. Kompaniya tarixiy ko‘lamdagi inqirozga duch keldi: 3-fevraldagi savdolar chog‘ida uning kotirovkalari 26,39 foizni yo‘qotdi va har bir aksiya narxi 237,76 dollargacha tushib ketdi. New York Post xabariga ko‘ra, bozor kapitallashuvi 232 milliard dollarga kamaygan.
Izoh (0)