AQSh Davlat kotibi Entoni Blinken AQSh Belarus hukumatining “ko‘p sonli” vakillariga nisbatan viza cheklovlari joriy etilayotganini ma’lum qildi. Vashington nazdida ushbu fuqarolar “chet eldagi boshqacha fikrlovchi belaruslarning ta’qib qilinishi”ga aloqador.
“Davlat departamenti ma’muriyat ‘Qoshiqchi taqiqi’ — transmilliy repressiyaga qarshi kurash vositasi (ma’muriyat 2021-yilda e’lon qilgan) doirasida Belarus fuqarolari uchun viza cheklovlarini joriy qilmoqda”, — deyiladi bayonotda.
Blinkenning qo‘shimcha qilishicha, ayrim Belarus fuqarolariga nisbatan bugungi choralar “boshqacha fikrlovchilarga qarshi jiddiy ekstraterritorial harakatlar”ga aloqadorlik uchun ko‘rilmoqda.
OAV so‘roviga javoban Davlat departamenti “bunday ma’lumotlarning maxfiyligini” bildirib, Vashingtonning vizaga oid sanksiyalari ostida qolgan Belarus vakillari ismini aytishdan bosh tortdi. “AQSh qonunchiligiga ko‘ra, viza qaydlari maxfiy hisoblanadi. Biz ushbu chora qo‘llaniladigan shaxslarni aniq qilib ko‘rsatadigan tafsilotlarni bera olmaymiz”, — dedi Davlat departamenti vakili.
Blinkenning bayonotiga ko‘ra, Pekin Olimpiadasi boshlanishiga to‘g‘ri kelgan sanksiyalar belaruslik sportchilarning ta’qib qilinishi uchun javobgarlik chorasi sifatida qo‘llanilmoqda.
Sanksiya mexanizmi Washington Post jurnalisti Jamol Qoshiqchi xotirasiga atalgan. U 2018-yilning oktabr oyida Turkiyaning Istanbul shahridagi Saudiya Arabistoni konsulxonasida o‘ldirilgan edi.
Izoh (0)