Finlyandiya hukumati O‘zbekiston ta’lim tizimini yaxshilash uchun mablag‘ ajratdi, deya “Daryo”ga xabar qilmoqda Ta’lim sifatini nazorat qilish davlat inspeksiyasi.
Qayd etilishicha, Ta’lim inspeksiyasi, Xalq ta’limi va Tashqi ishlar vazirligi mutasaddilaridan iborat O‘zbekiston delegatsiyasi Shavkat Mirziyoyev ko‘rsatmasiga binoan fin ta’lim tizimini chuqur o‘rganish maqsadida Finlyandiyaga rasmiy tashrifni amalga oshirgan.
Tashrif davomida Ta’lim sifatini nazorat qilish davlat inspeksiyasi hamda Finlyandiya milliy ta’lim agentligi o‘rtasida o‘zaro hamkorlik memorandumi imzolangan.
Mazkur memorandumda ta’limda sifat va amaliyotini rag‘batlantirish maqsadida tizimni rivojlantirish, jumladan, yangi pedagogik usullar, o‘qitish jarayonlari, pedagogik boshqaruv, o‘quv dasturlarini ishlab chiqish, tadqiq etish, baholash va joriy etish hamda o‘qituvchilar malakasini oshirishni rivojlantirish kabi maqsadlar o‘rin olgan.
Shu bilan birgalikda, mazkur hujjat doirasida o‘qituvchilar malakasini oshirish sohasida innovatsion pedagogik tajriba almashish va yangi texnologiyalardan foydalanishga ko‘maklashish, konferensiyalar va seminarlar o‘tkazishni rag‘batlantirish orqali ta’lim sohasida hamkorlikni rivojlantirish kabi loyihalarni amalga oshirish ham rejalashtirilgan.
Tashrifning ilk amaliy natijalaridan biri sifatida Finlyandiya hukumati tomonidan hamkorlik memorandumida ko‘zda tutilgan vazifalarni amalga oshirishni qo‘llab-quvvatlash maqsadida 1 million yevro miqdorida mablag‘ ajratildi.
Shuningdek, mazkur loyiha rejasini ishlab chiqish va O‘zbekiston tomoni bilan kelishish uchun esa qo‘shimcha 55 000 yevro mablag‘ ajratilgan bo‘lib, unda fin ta’lim tizimi vakillaridan iborat delegatsiya O‘zbekistonga tashrif buyurishi, ta’lim jarayonlari bilan yaqindan tanishgan holda Ta’lim inspeksiyasi vakillari bilan muhokamalar o‘tkazish orqali loyiha rejasini ishlab chiqishi ko‘zda tutilgan.
Dastlabki kelishuvlarga ko‘ra, loyiha doirasida fin ta’lim ekspertlarini jalb qilgan holda o‘quv jarayonlarini tashkil qilish, o‘quv-metodik adabiyotlar yaratish, ta’lim vakillari uchun malaka oshirish kurslari faoliyati ko‘zda tutilmoqda.
Ta’lim yo‘nalishidagi yaqin hamkorlikning davomi sifatida kelgusida finlyandiyalik va estoniyalik hamkorlar ko‘magida O‘zbekiston ta’lim tizimining xalqaro ta’lim hamjamiyatiga qo‘shilishiga qaratilgan Twinning dasturini amalga oshirish bo‘yicha muzokaralar olib borilmoqda.
Ma’lumot uchun, Twinning, ya’ni “birodarlik” loyihasi Yevropa Ittifoqi qonunchiligi uchun zarur ko‘nikma va tajribaga ega bo‘lgan institutsional hamkorlik orqali sherik mamlakatlarni qo‘llab-quvvatlashga qaratilgan uzoq muddatli loyiha hisoblanadi.
Ushbu loyihaning asosiy maqsadi kadrlar tayyorlash va davlat institutlari tuzilmalarini qayta tashkil etishni qo‘llab-quvvatlash orqali sherik davlatlar ma’muriyatlarining boshqaruv salohiyatini oshirishga qaratilgan.
Izoh (0)