Ijtimoiy tarmoqlarda Qashqadaryoning yagona ayol hokimi 2020-yilning mart oyidan beri Qarshi tumanini boshqarib kelayotgan Maqsuda Mustafoyeva ishdan bo‘shatilgani haqida xabarlar tarqaldi. Oradan ikki kun vaqt o‘tsa-da, tuman hokimligi axborot xizmati mazkur ma’lumotni na tasdiqladi va na inkor qildi. Shundan so‘ng “Daryo” muxbiri mazkur axborotga aniqlik kiritishga urindi.
Bu haqda “Daryo” muxbiri bilan suhbatlashgan Qashqadaryo viloyati hokimligi axborot xizmati rahbari Ahror Sodiqov Mustafoyevaning ishdan ketganini tasdiqladi.
“Maqsuda Mustafoyeva o‘z arizasiga ko‘ra ishdan olindi”, — deydi Ahror Sodiqov.
Ahror Sodiqovning gapini rad etgan “Daryo” manbasi esa 2022-yilning 2-fevral kuni davlat rahbari Shavkat Mirziyoyev raisligida videoselektor yig‘ilishi o‘tkazilganini, unda prezident ko‘plab tuman hokimlarining ish faoliyatidan qoniqmayotganini aytib, Qashqadaryo viloyatining yagona ayol hokimini ishdan olganini bildirgan. Va bu boshqalarga “dars” bo‘lishi kerakligini ta’kidlagan.
Qarshi tumanini salkam ikki yil boshqargan Maqsuda Mustafoyeva hokimlikka kirishganidan bir oy ham o‘tmasdan, prezident ishonch bildirgan klasterni tugatish tashabbusi bilan chiqib, ko‘pchilik e’tiboriga tushgan bo‘lsa, tadbirkorni tuman uchun bog‘cha yoki maktab qurib bermaslikda ayblashi ortidan ko‘plab muhokamalar sababchisi bo‘lishga ham ulgurgandi. Keyinchalik tadbirkor bilan sudlashishni boshlagan hokim tadbirkorni telefon qo‘ng‘iroqlariga javob bermaslikda aybladi.
Yuz million so‘mlik saxovat pullarining yeb ketilishi ortidan yana internetda ko‘rinish bergan Maqsuda Mustafoyeva viloyatning sobiq hokimi Zoir Mirzayevning afsusiga ham sabab bo‘lgandi. Jurnalist va blogerlar bilan suhbatlashgan Zoir Mirzayev Maqsuda Mustafoyeva haqida gapirib, “Barchada xato va kamchiliklar bo‘ladi, albatta. Rahbar sifatida buni tanqid qilaman. Yaqinda Qarshi tumani hokimi bilan suhbatlashib, kamchiliklarini ko‘rsatdim. Men boshida uning ishini ko‘rmasdan, hokimlikka tavsiya berganimni xatoyim deb bilaman”, — degandi.
Izoh (0)