2-fevral kuni Nukus shahrida ko‘p sonli odamlar avtomobil yo‘lini to‘sib qo‘ygani to‘g‘risida xabar berilgandi. “Gazeta.uz”ning ma’lum qilishicha, yo‘lni to‘sgan 3 nafar fuqaroga 15 sutka ma’muriy qamoq jazosi tayinlangan.
Nashr ma’lumotlariga ko‘ra, yo‘lni to‘sganlar “Nukua dilisha” MChJga qarashli 3 qavatli savdo binosida ijara asosida faoliyat yurituvchi tadbirkorlar. Do‘konlarning ijara puli so‘nggi 3−4 oy ichida ko‘tarilgan. Yaqinda esa ijarachilarga ijara puli yana 1 million so‘mga ko‘tarilishi ma’lum qilingan. Xususan, ikkinchi qavatda 2−3 million so‘mga ijarada turuvchi tadbirkorlar kelasi oydan boshlab ijara uchun 3−4 million so‘mdan to‘lashlari kerak bo‘lgan. Natijada ijarachi tadbirkorlardan taxminan, 50 nafari noroziligini bildirish uchun bozor yonidagi yo‘lni to‘sgan.
Qoraqalpog‘iston Respublikasi Ichki ishlar vazirligi ushbu vaziyatni jamoat tartibini buzish deb atagan. 4-fevral kuni vazirlik mahalliy telekanalda sodir bo‘lgan vaziyat bo‘yicha qo‘shimcha ma’lumot bergan. Unda holat yuzasidan qo‘zg‘atilgan ma’muriy ish Jinoyat ishlari bo‘yicha Nukus shahar sudi tomonidan ko‘rib chiqilgani aytilgan.
Sud qaroriga ko‘ra, Nukus shahrida yashovchi T.Sh, M.T va J.S.ga nisbatan Ma’muriy javobgarlik to‘g‘risidagi kodeksning 201-moddasiga (yig‘ilishlar, mitinglar, ko‘cha yurishlari yoki namoyishlar uyushtirish, o‘tkazish tartibini buzish) muvofiq, yig‘ilishlar, mitinglar, ko‘cha yurishlari yoki namoyishlar uyushtirish, o‘tkazish tartibini buzganligi uchun har biriga 15 sutka ma’muriy qamoq jazosi tayinlangan.
Qoraqalpog‘iston IIV matbuot xizmati rahbari Dauran Yelmuratov “bu kabi harakatlarni amalga oshirish davlatimizda qonun bilan taqiqlangani” haqida fuqarolarni ogohlantirgan.
Bundan avval Qo‘yliqda bozor buzilishidan norozi odamlar katta avtoyo‘lni to‘sgan edi. Keyinchalik voqea ishtirokchilari qamoqqa olingandi.
Izoh (0)