AQSh prezidenti Jo Bayden “Tolibon” hukumatining qonuniyligi masalasini ko‘rib chiqish uchun zarur bo‘lgan dastlabki shartni aytdi. Bu haqda Oq uy saytidagi bayonotda ma’lum qilingan.
Bayden “Tolibon”dan 2020-yilda Afg‘onistonda qo‘lga olingan AQSh harbiy dengiz kuchlari faxriysi Mark Frerixsni ozod qilishni talab qildi va shundan keyingina toliblar hukumatini qonuniylashtirish muhokamasi boshlanishi mumkinligini aytdi.
“ ‘Tolibon’ ularning qonuniylikka intilishlari borasidagi har qanday masalaning ko‘rib chiqilishiga umid qilishdan avval Markni zudlik bilan ozod qilishi kerak. Bu masalada hech qanday muzokaraga o‘rin yo‘q”, — dedi Bayden.
Bayonotga ko‘ra, Frerixs 2020-yilning fevral oyi boshida Kobulda g‘oyib bo‘lgan. U Afg‘onistonda o‘n yil quruvchi-muhandis bo‘lib yashagandi.
Baydenning aytishicha, Illinoys shtatida tug‘ilgan Frerixsning oilasi “uqubatli ikki yilni boshidan kechirgan, uning xavfsizligi uchun ibodat qilgan, qayerdaligi va ahvoli qanday ekani haqida har xil gumonda bo‘lgan va uning qaytishini tilagan”.
Avvalroq Norvegiya poytaxti Osloda G‘arb diplomatlari va huquq faollarining “Tolibon” vakillari bilan muzokaralari bo‘lib o‘tgandi. Uchrashuvning asosiy mavzusi afg‘on xalqiga gumanitar yordam berish va mamlakatda inson huquqlariga rioya qilish masalasi bo‘lgan. Norvegiya Tashqi ishlar vazirligi bu uchrashuvlar “Tolibon”ni tan olish emasligini ta’kidlagan.
Undan avval “Tolibon” Norvegiyada afg‘on fuqarolik jamiyatining a’zolari bilan muzokaralar o‘tkazgandi.
Izoh (0)